Gruaja e Ali Khameneit, Mansoureh Khojasteh Bagherzadeh, ka vdekur disa ditë pasi u plagos nga sulmet izraelito-amerikane, sipas raportimeve në Iran.
Më 28 shkurt, Ajatollah Ali Khamenei, prijësi suprem i Iranit, në pushtet të Republikës Islamike që nga viti 1989, mbeti i vrarë gjatë sulmeve të koordinuara nga amerikanët dhe izraelitët.
SHBA dhe Izraeli goditën shumë qytete iraniane, duke shkatërruar edhe bunkerin e Khameneit, ku mbetën të vrarë gjithashtu e bija, dhëndri dhe e mbesa.
Donald Trump, në një deklaratë për mediat tha se Ali Khamenei u përpoq ta vriste dy herë. Sipas mediave, Trump tha: Unë e godita atë përpara se ai të më sulmonte mua.
“E kapa atë para se të më kapte ai mua. Ata u përpoqën dy herë. Epo, unë e kapa i pari.”
Çfarë tha Trump për vdekjen e Khameneit
Duke e quajtur Khamenein një nga njerëzit më të këqij në histori, Trump njoftoi vdekjen e Liderit Suprem Iranian në mediat sociale.
“Kjo nuk është vetëm Drejtësi për popullin e Iranit, por për të gjithë amerikanët e mëdhenj dhe ata njerëz nga shumë vende në të gjithë botën, që janë vrarë ose gjymtuar nga Khamenei dhe banda e tij e banditëve të etur për gjak”, deklaroi Trump në një postim në platformën e tij të mediave sociale, Truth Social.
“Ai nuk ishte në gjendje të shmangte Inteligjencën tonë dhe Sistemet e Gjurmimit shumë të Sofistikuara dhe, duke punuar ngushtë me Izraelin, nuk kishte asgjë që ai, ose udhëheqësit e tjerë që janë vrarë së bashku me të, mund të bënin”, shtoi Trump.
Trump beson se ky është “shansi më i madh” për popullin iranian për të rimarrë vendin e tij. Ai i ka nxitur iranianët të ngrihen dhe të rrëzojnë regjimin.
