Ministri për Çështtje Europiane, Orhan Murtezani, mëngjesin e sotëm, realizoi takim me ministrin për Evropë të Gjermanisë, Ginter Krihbaum. Bashkë realizuan një takim me përfaqësues të lartë të Maqedonisë së Veriut, ku u diskutua hapur për perspektivën evropiane të vendit dhe domosdoshmërinë që Bashkimi Evropian të mbetet i përkushtuar ndaj vlerave dhe kritereve të tij themelore.
Në fokus të takimit ishte nevoja për mbrojtjen e procesit të negociatave të aderimit nga kushtëzimet dypalëshe dhe narrativat revizioniste. Në këtë drejtim, u theksua rëndësia e krijimit të mekanizmave efektivë evropianë për vendosjen dhe monitorimin e standardeve dhe ekspertizës, sidomos në fushën e çështjeve historike dhe marrëdhënieve dypalëshe – për të garantuar një proces të drejtë, të parashikueshëm dhe të bazuar në merita.
“Maqedonia e Veriut po implementon reforma të rëndësishme, po ndërton sundimin e ligjit dhe po përgatitet institucionalisht për anëtarësim. Por është po aq e rëndësishme që edhe vetë BE-ja të jetë e gatshme për zgjerim,” u theksua gjatë takimit.
Ministri Krihbaum konfirmoi se Gjermania do të vazhdojë të mbështesë integrimin gradual të vendeve kandidate në BE, duke ruajtur standardet dhe ofruar përfitime konkrete për qytetarët edhe gjatë rrugës drejt anëtarësimit.
“Jam mirënjohës për mbështetjen gjermane, sepse perspektiva evropiane është një qëllim i përbashkët,” përfundoi deklarata.
