Një vendim i fundit i FDA-së (Administrata e Ushqimit dhe Ilaçeve) në Amerikë mund të konsiderohet si një hap historik në luftën kundër kancerit. Terapia e re e miratuar nga FDA-ja është në praktikë terapia e parë gjenetike e bazuar te qeliza që bëhet e aksesueshme në SHBA.
Ajo quhet terapia CAR-T dhe funksionon mbi bazën e qelizave T (lloj qelizash autoimune) të vetë pacientit . Këto qeliza merren nga pacientët dhe modifikohen me një gjen të ri, i cili kodon një proteinë specifike. Qelizat e modifikuara T vendosen në trupin e pacientit, ku nisin të sulmojnë qelizat kancerogjene.
Gjiganti i farmaceutikës Novartis ka gjeneruar preparatin Kymirah. FDA ka aprovuar përdorimin e tij për një lloj të kancerit akut të gjakut, leukemia limfoblastike. Vendimi i hap dritën jeshile përdorimit të Kymirah për të trajtuar fëmijët dhe të rinjtë që nuk kanë përmirësime nga terapitë e zakonshme apo që kanë përkeqësime të gjendjes. Në eksperimentet klinike, terapia gjenetike është provuar efektive dhe ka sjellë përmirësim në masën 83 % të rasteve në vetëm 3 muaj. Novartis i ka vënë çmimin 475.000 dollarë për vetëm një trajtim, ndërsa premton se nuk do të paguajnë asgjë pacientët që nuk përmirësohen brenda muajit të parë.
Një epokë e re
Sipas Institutit Kombëtar për Kancerin, janë rreth 3 100 raste të reja me leuçemi limfoblastike çdo vit.
“Me aftësinë për të riprogramuar qelizat e pacientit, me qëllim që ai vetë ta luftojë kancerin, ne po hyjmë në hapësira të reja të inovacionit mjekësor”, thotë komisioneri i FDA-së, Scott Gottlieb. “Teknologjitë e reja si terapia gjenetike dhe qelizore kanë potencialin për ta transformuar mjekësinë dhe për t’i hapur rrugë kurimit të shumë sëmundjeve të rënda”, thotë ai.
