Një incident është verifikuar mes vëzhguesve në Vlorë, në qendrën e votimit në fshatin Ahmetaq. Rrethanat e ngjarjes janë ende të paqarta, por në zonë kanë mbërritur forca të shumta policore. Sherri ka ndodhur jashtë ambienteve të qendrës së votimit, në një shkollë 9-vjeçare.
Një komisioner i Partisë Socialiste në një qendër votimi në Elbasan është dhunuar nga disa persona. Ngjarja ka ndodhur në qendrën e votimit numër 2.345, pasi komisioneri është përpjekur të parandalojë votimin familjar. Agresorët nuk janë identifikuar ende, por për fat të mirë procesi i votimit nuk është ndërprerë dhe komisioneri është zëvendësuar.
Ndërkohë, po në Elbasan, në qendrën e votimit numër 2.590, në fshatin Shalës të Cërrikut, një person ka ofenduar nënkryetaren e KZAZ-së numër 46.
Një situatë e tensionuar është shënuar në Shëngjin ku një person dyshohet se ka mbetur i plagosur. LSI që ka bërë të ditur se Florian Dushku është goditur nga tre persona të armatosur. LSI thotë se Dushku është qëlluar me qytën e pistoletës. Ndërkohë drejt Lezhës është nisur dhe kryetari i zgjedhur, Ilir Meta.
“Menjëherë në vendngjarje kanë mbërritur shërbimet policore ku nga këqyrja e vendit të ngjarjes është gjetur dhe sekuestruar një gëzhojë. Tek spitali nuk ka mbërritur asnjë person për ndihmë mjekësore. Nga hetimet paraprake dyshohet se konflikti ka qenë i çastit midis shtetasit F.D. 27 vjeç, dhe personave të tjerë për të cilët po punohet për identifikimin e tyre. Në bashkëpunim dhe koordinim me Prokurorinë e Rrethit Gjyqësor Lezhë , vazhdojnë hetimet për zbardhjen e motiveve dhe rrethanave të ngjarjes. Procesi i votimit vijon normalisht”, bën të ditur policia e Lezhës./InfoShqip.com
