Të paktën nëntë gra që morën pjesë në një festë të Partisë Social Demokrate Gjermane, ku i pranishëm qe dhe kancelari Olaf Scholz, u droguan me të ashtuquajturat “pilula përdhunimi”, tha SPD sot për AFP.
“Përçarja është shumë e madhe,” i tha AFP një zëdhënës i grupit parlamentar socialdemokrat, duke konfirmuar informacionin nga gazeta Tagesspiegel.
Policia e Berlinit njoftoi se është duke hetuar një rast lëndimi të rëndë trupor pasi një grua 21-vjeçare ka ngritur padi.
“Unë i këshilloj të gjithë të interesuarit të paraqesin një ankesë,” shkroi gjithashtu një zyrtar i grupit parlamentar në Tëitter.
Deri më tani janë shënuar nëntë viktima, por përfaqësuesi i grupit parlamentar nuk ka përjashtuar mundësinë e më shumë.
Në një e-mail drejtuar pjesëmarrësve të kësaj feste verore të mbajtur mbrëmjen e së mërkurës, SPD denoncoi “një akt monstruoz që u denoncua menjëherë nga ne në policinë e Bundestagut”.
Rreth një mijë persona morën pjesë në festën tradicionale verore të SPD-së që zhvillohet para pushimeve verore, ku ndër të tjera marrin pjesë kancelari dhe shumë deputetë e bashkëpunëtorë të tij.
“Ishte një festë e brendshme. Mund të hyhej vetëm me ftesë”, tha zëdhënësi. “Ka ende shumë pyetje, policia po heton”.
Në një deklaratë, policia e Berlinit, duke iu referuar një “feste verore të partisë politike”, tha se ata ishin alarmuar nga një grua 21-vjeçare, e cila një ditë pas incidentit nuk mbante mend asgjë nga nata e kaluar.
Ajo shkoi në spital për kontroll mjekësor dhe bëri denoncimin.
Në festë, e reja, e cila kishte konsumuar ushqime dhe pije freskuese, është ndjerë keq, duke vuajtur nga të përziera dhe sidomos marrje mendsh.
Policia tha se deri më tani janë njoftuar edhe për katër raste të tjera.
