Juventusi do të marrë pjesë në Ligën e Kampionëve sezonin e ardhshëm. Ky është verdikti që nxori java e fundit e Serie A. Në fakt, bardhezinjtë fituan 4-1 në fushën e Bologna, duke siguruar tri pikë shumë të rënda, që i lejuan ata të kapërcenin Napolin, i cili nuk arriti të shkonte më larg se barazimi 1-1 në shtëpi, ndaj Veronës.
Andrea Pirlo, duke folur për mikrofonët e DAZN, pas fishkëllimës së fundit të trefishtë të ndeshjes në “Dall’Ara”, nuk mendoi se cila do të jetë e ardhmja e tij: “Po nëse kjo javë ka ndryshuar ndonjë gjë? Për mua ishte e rëndësishme të mbaronte sa më mirë puna e filluar verën e kaluar. Fitova Kupën e Italisë dhe e kualifikova ekipin në Champions, pjesën tjetër ua lëmë atyre që vendosin për të ardhmen. Gjithmonë kam punuar shumë dhe ky është rezultati përfundimtar”.
Juventusi shpesh është dashur të merret me mungesën e Dybala këtë sezon: “Një lojtar si ai ndryshon nivelin e secilës skuadër, është normale. Fatkeqësisht, ne kurrë nuk e kishim në dispozicion dhe madje edhe kur u kthye nuk ishte në top-formë, sepse iu desh të gjente gjendjen dhe kohën e vrapimit. Aftësitë e tij, që ne të gjithë i dimë, na kanë munguar. Kjo është e qartë”.
Trajneri i Juventusit shpjegoi se si e imagjinon të ardhmen: “Unë imagjinoj një Juve më të fortë dhe më të vetëdijshme për aftësitë e veta. As djemtë nuk e dinë se sa të fortë janë, vetë Rabiot bëri një finish të jashtëzakonshëm sezoni; më në fund u çlirua nga pasiguritë që kishte. Ai provoi të ishte një mesfushor unik në botë për forcën fizike dhe teknike. Është me të vërtetë një kampion”.
Juventusi ka qenë mjaft i ekuilibruar në muajin e fundit: “Ne jemi në rrugën e duhur. Nëse ekziston dëshira për ta vendosur veten në shërbim të ekipit, atëherë është më lehtë të arrish rezultatin, duke pasur parasysh cilësinë teknike që kemi. Ne duhej të zbulonim dëshirën që kishim brenda dhe në fund arritën rezultatet. Nëse fillojmë përsëri, ne do ta bëjmë atë me baza të forta”.
Pirlo shpjegoi se ende e sheh veten në stolin e Juventusit, sezonin e ardhshëm: “E shoh veten 100%, pastaj nuk jam unë që vendos. Tani e shijojmë këtë kualifikim dhe pastaj do të kemi kohë të flasim për këtë me klubin”.
Në fund, një përmendje e vendimit për të mos e futur Cristiano Ronaldon në formacionin startues ndaj Bologna: “Një zgjedhje e përbashkët. Ai ishte i lodhur pas të mërkurës, u vu në dispozicion të ekipit, por unë vendosa të luaj me Morata, i cili e justifikoi veten”.
