Drejtori i Përgjithshëm i Policisë së Shtetit, Drejtues Madhor Ilir Proda, ka vlerësuar dhe falënderuar Inspektor Klajdi Mustaj për humanizmin dhe përgjegjshmërinë e treguar ndaj qytetarëve dhe detyrës, pas ndërhyrjes së guximshme për shpëtimin e tre personave të lënduar në një aksident në aksin Levan–Fier.
Për këtë akt guximi dhe përkushtimi, Drejtori i Përgjithshëm i akordoi Inspektorit të Policisë Rrugore “Certifikatën për Shërbime të Dalluara”, duke theksuar se veprimi i tij është shembull frymëzues për të gjithë trupën policore.
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë në shpëtimin e tre bashkëqytetarëve është shembull për t’u ndjekur. Faleminderit për guximin dhe zemrën e madhe që tregove në shërbim të qytetarëve”, – u shpreh Ilir Proda.
Inspektor Klajdi Mustaj është pjesë e Policisë së Shtetit prej shkurtit 2024, kur përfundoi Kolegjin Profesional për Patrullë të Përgjithshme. Ai ka diplomë “Bachelor” në Shkencat Juridike dhe aktualisht vijon studimet “Master”.
