Një incident i madh në rrjetin e sistemit energjetik në pjesën juglindore të Evropës ka bërë që të kishte ndërprerje disaorëshe të rrymës të premten në Shqipëri, Mal të Zi, Bosnje e Hercegovinë dhe pjesërisht në Kroaci, njoftoi Rrjeti Evropian i Operatorëve të Sistemit të Transmisionit për Energji (ENTSO).
“Operatorët e prekur të Sistemit të Transmisionit (OST), me ndihmën e OST-ve fqinje, e rikthyen furnizimin me rrymë në rrjetet e tyre brenda 2 orëve përafërsisht, me qëllim që ta minimizonin ndikimin e ndërprerjes së rrymës tek konsumatorët”, tha ENTSO në një komunikatë të premten vonë .
ENTSO tha se është duke mbledhur të dhëna teknike për këtë incident nga OST-të e prekura dhe se do ta kryejë një hetim në javët në vijim me ndihmën e një grupi ekspertësh.
Kompania e Furnizimit me Energji Elektrike të Kosovës (KESCO) tha për Radion Evropa e Lirë se nuk ka probleme me furnizim me energji elektrike në Kosovë.
Më herët të premten, Operatori i Sistemit të Transmisionit (OST) në Shqipëri tha se shkaktarët e ndërprerjes së rrymës kanë qenë volumet e larta të transmetimit dhe temperaturat ekstreme, që kanë shkaktuar defekte në linjën e interkoneksionit me Greqinë.
“Defekti ka filluar nga linja e interkoneksionit me Greqinë dhe më pas ka vazhduar me efekt kaskadë në të gjithë vendin”, tha OST përmes një njoftimi.
Ministrja e Infrastrukturës dhe Energjisë e Shqipërisë, Belinda Balluku, tha më vonë se ndërprerja zgjati rreth gjysmë ore në gjithë vendin dhe konfirmoi se, sipas një analize fillestare, temperaturat e larta dhe sistemi i ngarkuar i transmetimit ishin shkaktarë.
“Kemi arritur të rikuperojmë situatën brenda 30 minutash në gjithë vendin, e për Tiranën për 17 minuta”, tha ajo në një video të publikuar në faqen e kryeministrit shqiptar Edi Rama në Facebook.
Ajo shtoi se Shqipëria “vazhdon të jetë zonë me rrezikshmëri të lartë, sepse volumet e transmetimit në linjat e interkonjeksionit janë të mëdha dhe temperaturat do të mbeten në nivele rekord edhe ditët në vijim”.
Sistemi për shpërndarjen e rrymës në Mal të Zi njoftoi përmes një postimi në Facebook se kishte ndërprerje të energjisë elektrike dhe se pothuajse i tërë vendi ishte pa rrymë të premten pak pas mesditës.
Ministri malazez i Energjisë dhe Minierave, Sasha Mujoviq, tha se problemi i ndërprerjeve të energjisë elektrike ishte “i natyrës rajonale, është një dështim rajonal”.
“Po punojmë për normalizimin e situatës dhe rikthimin e sistemit”, tha Mujoviq të premten më herët.
Ai beson se kjo ka ndodhur për shkak të ngarkesës së madhe.
“Konsumimi u rrit ndjeshëm për shkak të temperaturave të larta. Në një situatë të temperaturave të larta, ndodh që ftohja e ajrit të jetë më e dobët, dhe temperaturat e larta çojnë në rënien e linjës”, shtoi Mujoviq.
Edhe Kroacia njoftoi se disa pjesë të vendit ishin përballur me ndërprerje të rrymës gjatë ditës, përderisa autoritetet kroate, së bashku me homologët e tyre në shtetet fqinje, thanë se po analizonin shkakun e ndërprerjes së rrymës.
Mali i Zi, Kroacia dhe Shqipëria e ndajnë vijën bregdetare të Detit Adriatik. Rrjetet energjetike në rajon vazhdojnë të jenë të lidhura edhe pas luftërave në Ballkan në vitet e ’90-ta.
Operatori i Pavarur i Sistemit në Bosnje e Hercegovinë (BeH) tha se “nuk ishte e mundur të parandalohej kolapsi i sistemit të energjisë elektrike” në këtë shtet.
“Ndërprerja e furnizimit me energji elektrike është përhapur edhe në Kroaci, me të cilën Bosnje e Hercegovina ka numrin më të madh të linjave ndërlidhëse të transmisionit”, tha operatori.
Operatori theksoi se normalizimin e situatës e pengojnë tensionet e larta në rrjetin 400 dhe 220 kilovolt (kV).
Ndërkaq, drejtori i Kompanisë së Energjisë Elektrike në Republikën Sërpska, Luka Petroviq, i tha Radios Evropa e Lirë se arsyeja e ndërprerjes së rrymës në pothuajse tërë territorin e Bosnjës ishte për shkak të një “problemi në rrjetin e energjisë në Mal të Zi”.
Probleme me rrymë nuk janë raportuar në Serbi dhe Maqedoni të Veriut.
Ndërprerja e rrymës të premten pasdite ndodhi në një kohë kur autoritetet në rajon i paralajmëruan qytetarët të jenë të kujdesshëm, të pinë ujë dhe ta shmangin diellin, për shkak të temperaturave tejet të larta.
Meteorologët thonë se i nxehti në rajon këtë javë erdhi nga Afrika.
Ditëve të fundit, Kosova është përballur me temperatura mbi 35 gradë Celsius.
