Një familje nga Maqedonia është në qendër të një skandali korrupsioni në Berlin, ku autoritetet gjermane bastisën dy banesa si pjesë e një hetimi për shtetësi të përfituar në mënyrë të paligjshme. Një punonjës 38-vjeçar i Zyrës për Natyralizim dyshohet se ka falsifikuar dokumente dhe ka dhënë shtetësi gjermane një familjeje me dy fëmijë të mitur nga Maqedonia, në këmbim të ryshfetit.
Dyshohet se zyrtari ka përgatitur dhe firmosur certifikatat me emër të rremë dhe me vulë të huaj, madje ka fshirë dosjet e familjes duke përdorur kredencialet e kolegëve të tij. Ai dyshohet edhe për lidhje dashurie me gruan e familjes, që mund të jetë motivi i veprës penale.
Gjatë kontrollit janë sekuestruar prova dhe pajisje elektronike. Punonjësi është pushuar menjëherë nga puna dhe janë marrë masa të reja sigurie në institucion. Edhe dy anëtarë të tjerë të familjes (39 dhe 36 vjeç) janë nën hetim për ryshfet.
