Banorët e lagjes Teferiç në Strugë kanë reaguar ndaj një tabele të re komunikacioni të vendosur në hyrje të rrugës që të çon drejt fshatit Beliçë e Epërme, pasi ajo mungonte tërësisht në gjuhën shqipe, raporton portali Strugalajm.
Si shenjë proteste, banorët e kanë hequr tabelën, duke e cilësuar këtë mungesë si shkelje të ligjit dhe njëkohësisht si provokim.
“Nuk e dimë nëse tabela është vendosur nga pushteti lokal apo nga ndërmarrja përkatëse e rrugëve, por mungesa e gjuhës shqipe është e papranueshme,” kanë thënë banorët për Strugalajm.com.
Ata theksojnë se përdorimi i gjuhës shqipe në tabela të tilla është i garantuar me ligj, sidomos në zona ku shqiptarët përbëjnë një përqindje të konsiderueshme të popullsisë.
