Një deklaratë befasuese është publikuar pak minuta më parë nga presidenti amerikan Donald J. Trump në rrjetin e tij Truth Social, ku ai pretendon se Izraeli dhe Irani kanë rënë dakord për një armëpushim të plotë dhe të përgjithshëm, i cili do të hyjë në fuqi pas përfundimit të misioneve të fundit në terren, brenda rreth 6 orësh.
Sipas Trump, fillimisht do të jetë Irani që do të ndalojë zjarrin për 12 orë, pasuar nga Izraeli, ndërsa në përfundim të 24 orëve, e ashtuquajtura “Lufta 12-Ditore” do të konsiderohet zyrtarisht e përfunduar.
“Dua të përgëzoj të dy vendet, Izraelin dhe Iranin, për qëndrueshmërinë, guximin dhe inteligjencën për t’i dhënë fund kësaj lufte, e cila mund të kishte zgjatur për vite dhe të kishte shkatërruar të gjithë Lindjen e Mesme,” shkruan Trump në deklaratën e tij.
Ai shton se gjatë secilit armëpushim, pala tjetër do të qëndrojë paqësore dhe respektuese, dhe nëse gjithçka shkon sipas planit, bota do të përshëndesë zyrtarisht përfundimin e konfliktit.
Megjithatë, deri në këto momente nuk ka ende një konfirmim zyrtar nga qeveria izraelite apo ajo iraniane, as nga ndonjë institucion ndërkombëtar si OKB apo SHBA-të. Disa media prestigjioze, përfshirë The Wall Street Journal dhe The Guardian, kanë raportuar mbi postimin e Trump, por duke theksuar se situata në terren mbetet e tensionuar dhe me zhvillime të papritura.
Nëse kjo deklaratë konfirmohet nga palët zyrtare, do të shënonte një hap historik drejt stabilizimit të Lindjes së Mesme, një rajon i përfshirë prej dekadash nga konfliktet.
