Ministri i Jashtëm i Turqisë, Mevlut Çavuşoglu theksoi përgjegjësitë që Suedia ka në marrëveshjen trepalëshe për anëtarësim në NATO.
Çavuşoglu foli në konferencën e përbashkët për media që u mbajt pas takimit në Ankara me ministrin e Jashtëm të Suedisë, Tobias Billstrom, raporton aa.
Duke vënë në dukje se kanë shënuar mesazhet dhe hapat që Suedia ka ndërmarrë në kuadër të marrëveshjes trepalëshe të arritur mes Turqisë, Suedisë dhe Finlandës, Çavuşoglu tha se ndryshimet e bëra në kushtetutë dhe ligje do të hyjnë në fuqi në vitin 2023.
Për ekstradimin e personave të lidhur me terrorizmin, kryediplomati turk deklaroi se “lanë qenë të rëndësishme deklaratat e homologut tim kryesisht për vendosjen e distancës me organizatën terroriste PYD/YPG. Këto janë hapa të hedhur në drejtimin e duhur. Por, nuk ka një zhvillim konkret lidhur me disa çështje si ekstradimi i kriminelëve të lidhur me terrorizmin dhe ngrirjen e aseteve të terroristëve. Kemi mirëpritur ekstradimin e një personi, i cili nuk ndodhej në listën tonë”.
Ministri Çavuşoglu rikujtoi se Gjykata e Lartë e Apelit në Suedi refuzoi ekstradimin e anëtarit të FETO-s, gazetarit Bylent Kenes.
“Ky është një zhvillim shumë negativ. Hedhja e hapave shtesë në përputhje me marrëveshjen trepalëshe në lidhje me ekstradimin e personave me lidhje terroriste, janë pritshmëria jonë më e natyrshme dhe detyrime të Suedisë dhe Finlandës që rrjedhin nga marrëveshja”, tha Çavuşoglu.
Ndryshe, Suedia dhe Finlanda kanë aplikuar për tu bërë pjesë e aleancës më të madhe ushtarake NATO-s, por që ka hasur në kundërshtimin e shtetit turk. /Telegrafi/
