Heqja e vizave për qytetarët e Republikës së Kosovës, siç duket është një proces që nuk pritet të përfundojë së shpejti. Kështu të paktën i kanë bërë me dije zyrtarë të Bashkimit Europian kryeministrit të Kosovës, Avdullah Hotit, gjatë vizitës që pati në Bruksel.
Për më shumë se një dekadë qytetarët e Kosovës janë në pritje për heqjen e vizave, e pavarësisht se vendi ka plotësuar të gjitha kushtet, ky premtim i BE’së nuk u realizua.
Mirëpo një vendim i tillë siç duket nuk do të merret shpejt nga Këshilli Europian, e kjo u bë e ditur edhe në vizitën e Kryeministrit Hoti në Bruksel.
Në një lidhje direkte për Radiotelevizionin e Kosovës, gazetarja Xheraqina Tuhina ka bërë të ditur se heqja e vizave nuk është çështje primare për zyrtarët europian.
Këta të fundit, së pari po kërkojnë rikthimin e Kosovës e Serbisë në tavolinën e dialogut, ku me çdo kusht po kërkojnë që një proces i tillë të udhëhiqet dhe ndërmjetësohen nga ata.
Ndërkaq sot nga dy shtetet më të fuqishme në union, Franca e Gjermania, u pohua se janë të gatshëm për të filluar dialogun mes dy vendeve sa më parë që është e mundur.
Madje, presidenti francez Emmanuel Macron pritet që të mbajë Samitin e Parisit, ku do të marrin pjesë zyrtarë nga të dyja vendet.
Sa i përket çështjes së vizave, Këshilli Europian nuk po jep një vendim final rreth kësaj çështje duke e zvarritur më tej, si dhe duke kërkuar që vendi të plotësojë edhe të tjera kushte, si ajo kundër korrupsionit.
