Kuvendi i Malit të Zi duhet të votojë për gjyqtarët e Gjykatës Kushtetuese të bllokuar jo më vonë se fillimi i shkurtit, deklaroi sot para gazetarëve në Podgoricë Dritan Abazoviq, kryeministër në mandat teknik, pas takimit me ministren e Jashtme të Sllovenisë, Tanja Fajon.
Fajon mbërriti në Mal të Zi në emër të Bashkimit Evropian (BE), dhe Abazoviq tha se në takim nuk ka dëgjuar “se kemi lajme negative” – se është i mundur ndërprerja e negociatave për anëtarësim të Malit të Zi me BE-në.
Fajon ka qenë në Podgoricë për herë të dytë brenda njëzet ditësh, ndërsa sot është takuar edhe me zyrtarë të tjerë shtetërorë.
Herën e mëparshme, me urdhër të Përfaqësuesit të Lartë të Bashkimit Evropian (BE) për politikën e jashtme, Josep Borrell, ajo erdhi me ministrin e Çështjeve Evropiane dhe Ndërkombëtare të Austrisë, Alexander Schallenberg, më 21 dhjetor.
Fajon më pas paralajmëroi se BE mund të konsiderojë ndërprerjen e negociatave në fillim të këtij viti nëse Mali i Zi nuk krijon institucione funksionale.
Para vizitës së sotme, ajo bëri të ditur se krijimi i përbërjes së plotë të Gjykatës Kushtetuese është “hapi i parë” që Mali i Zi “duhet të bëjë për t’u kthyer në rrugën evropiane”.
Gjykata Kushtetuese e Malit të Zi është bllokuar që nga shtatori i vitit të kaluar, pasi nuk ka kuorum për të marrë vendime. Partitë parlamentare nuk kanë marrëveshje për zgjedhjen e gjyqtarëve dhe deri më tani kanë dështuar pesë konkurse për gjyqtarë të asaj gjykate.
Më 25 dhjetor të vitit të kaluar, Komisioni Kushtetues i Parlamentit të Malit të Zi shpalli konkursin e ri, të gjashtë publik për përzgjedhjen e katër nga shtatë gjyqtarët e asaj gjykate. Në konkurs aplikuan 27 avokatë.
Abazoviq u tha sot gazetarëve se tema e bisedës me Fajon ishin “shpalosja e rrethanave politike” dhe Gjykata Kushtetuese.
“Kemi dorëzuar atë që na është kërkuar… Kemi 27 aplikime (kandidatë) për Gjykatën Kushtetuese dhe besoj se parlamenti do ta përfundojë atë procedurë. Pritjet e të gjithëve janë që në fund të janarit ose mundësisht në fillim të shkurtit të kemi një seancë (të Kuvendit) ku do të votohen gjyqtarët. Më duket se fokusi i partnerëve tanë nga BE-ja, fokusi i Qeverisë, dhe besoj të gjithë aktorët politikë në vend, duhet të jetë ekskluzivisht zgjedhja e gjyqtarëve, funksionalizimi i Gjykatës”, tha Abazoviq.
Këtë vit, Mali i Zi pret si zgjedhje të jashtëzakonshme parlamentare ashtu edhe zgjedhje të rregullta presidenciale.
