Ambasadori shqiptar në Ankara, Kastriot Robo ka deklaruar në një lidhje për ABC, se deri më tani nuk raportohet për asnjë shqiptar të lënduar nga tërmeti i fuqishëm që goditi detin Egje mesditën e sotme. Ai megjithatë theksoi se këto shifra janë paraprake për shkak se aktualisht komunikimi telefonik në Izmir është ndërprerë për shkak të mbingarkesës së madhe.
“Ka pasur dëme. Ka pasur 4 viktima, 120 të plagosur dhe shumë godina të rrëzuara. Për momentin fatmirësisht nuk ka shqiptarë të lënduar. Zonat e prekura nga tërmeti kanë mbi 60% të popullsisë shqiptarë. Ne kemi vënë një numër emergjence i bëjmë thirrje qytetarëve të kenë kujdes.
Të telefonojnë në numrin tonë. Shërbimi turk i emergjencave që ishin në Shqipëri nëntorin e kaluar. Operacionet e kërkim- shpëtimit kanë filluar menjëherë. Shumë shpejt do të merren masa për strehimin e atyre që kanë mbetur jashtë. Nga informacionet e para pak minutash nuk kemi informacion për shqiptarë të lënduar“, tha Robo.
Ambasada shqiptare në Turqi ka shpërndarë numrin e urgjencës dhe i bën thirrje shqiptarëve të telefonojnë në rast nevoje. “Një tërmet i fortë ka goditur Turqinë perëndimore, pranë zonës së Izmirit. Ambasada shqiptare në Ankara i bën thirrje shtetasve shqiptarë të gjendur në zonë të transferohen në një zonë të sigurt dhe ka vendosur në dispozicion numrin e telefonit +90 549 561 1985 për çdo rast emergjence”, thuhet në njoftimin ambasadës.
