Asteroidi misterioz po habit shkencëtarët, dyshimet se mund të jetë anija sovjetike e zhdukur prej gati 40 vitesh

Një objekt misterioz që po lëviz në hapësirë ka tërhequr vëmendjen e shkencëtarëve, pasi po shfaq një sjellje të pazakontë që ende nuk është shpjeguar plotësisht. Bëhet fjalë për objektin 1998 KY26, i cili fillimisht është klasifikuar si një asteroid i vogël, por tashmë është në qendër të një hipoteze të pazakontë: mund të jetë një anije hapësinore sovjetike e zhdukur në vitin 1988.

Objekti ka një diametër prej rreth 11 metrash dhe kryen një rrotullim të plotë rreth vetes çdo 5,35 minuta. Ajo që ka ngritur pikëpyetje është përshpejtimi i tij, i cili nuk shpjegohet plotësisht nga forcat gravitacionale të Diellit dhe Tokës.

Një grup studiuesish, mes tyre astrofizikani i Universitetit të Harvardit, Avi Loeb, ka hedhur hipotezën se 1998 KY26 mund të jetë sonda sovjetike Phobos 1, e lëshuar më 7 korrik 1988 drejt Marsit. Gjatë misionit, sonda humbi kontaktet me Tokën dhe nuk u arrit më të rikthehej komunikimi me të.

Loeb dhe kolegët e tij kanë krahasuar karakteristikat e objektit me një model të sondës së zhdukur. Sipas tyre, përmasat, mënyra e reflektimit të dritës, rrotullimi dhe trajektorja paraqesin ngjashmëri që meritojnë të hetohen më tej.

Megjithatë, kjo nuk është e vetmja hipotezë. Një shpjegim i mëparshëm sugjeronte se objekti mund të ishte një “kometë e errët”, e cila çliron gazra dhe ndikon në trajektoren e saj. Por një studim i ri nga Instituti i Teknologjisë i Xhorxhias vë në dyshim këtë mundësi, pasi temperaturat e objektit janë tepër të larta për të ruajtur sasinë e nevojshme të akullit.

Nga ana tjetër, ekzistojnë edhe shpjegime natyrore, sipas të cilave përshpejtimi mund të shkaktohet nga presioni i rrezatimit diellor. Edhe drejtuesi i NASA-s, Jared Isaacman, ka deklaruar se objekti po monitorohet, por nuk ka prova se përbën rrezik për Tokën.

Përgjigjet më të qarta mund të vijnë në korrik të vitit 2031, kur sonda japoneze Hayabusa2 pritet t’i afrohet 1998 KY26 për ta studiuar nga afër.

Deri atëherë, ideja se objekti mund të jetë sonda sovjetike e humbur mbetet një hipotezë e pakonfirmuar.


PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu