Autoritetet turke thanë se hetimi për sulmin vdekjeprurës terrorist në qendër të Stambollit aktualisht po fokusohet në dy variante të mundshme se si u krye sulmi.
Ministri i Drejtësisë, Bekir Bozdag , në një deklaratë për mediat ka treguar se gruaja me shall në kokë, e cila shihet në pamjet e kamerave të sigurisë, është zyrtarisht e dyshuar për sulmin .
Ai tha se gruaja u ul në një stol në rrugën Istiklal për 45 minuta, më pas u largua dhe pak minuta më vonë shpërtheu bomba, të cilën gruaja e la në një çantë në stol.
Bozdag shtoi se janë duke u shqyrtuar dy versione të mundshme: që bomba shpërtheu vetë, me një kohëmatës të integruar ose u aktivizua me telekomandë.
“Ka dy versione. Në atë çantë apo pako, që ka qenë fillimisht në dorën e gruas, e më pas pranë saj, është mjeti shpërthyes, i cili aktivizohet vetë, ose dikush e aktivizon nga distanca. Kjo është duke u analizuar tani”, tha ministri.
Shpërthimi i fortë ka rënë pak pas mesditës në rrugën Istiklal, e cila është më e mbushura me njerëz gjatë fundjavës. Presidenti Rexhep Tajip Erdogan tha menjëherë pas ngjarjes tragjike se ishte një akt terrorist dhe se ishte përfshirë një grua.