Fitorja e Anthony Joshua ndaj boksierit shqiptar Kristian Prenga ka shkaktuar reagime të shumta, ndërsa mënyra se si ndryshoi ndeshja nga raundi i parë në të dytin ka ngritur edhe dyshime, shkruan InfoShqip.
Prenga e nisi përballjen në mënyrë të jashtëzakonshme, duke e rrëzuar dy herë Anthony Joshuan gjatë raundit të parë. Megjithatë, në raundin e dytë shqiptari u shfaq krejtësisht ndryshe, ndërsa Joshua mori kontrollin dhe e mbylli ndeshjen me nokaut.
Mes personave që reaguan ishte edhe ish-presidenti i Crystal Palace dhe analisti i njohur sportiv britanik, Simon Jordan.
Jordan shkroi se nuk ishte bindur nga ajo që kishte parë në ring, duke vënë në pikëpyetje ndryshimin e menjëhershëm në paraqitjen e Prengës.
“Joshua u rrëzua dy herë dhe Prenga vendosi ritmin e ndeshjes. Si shpjegohet kjo? Prenga ishte krejtësisht tjetër në raundin e dytë. Diçka nuk shkon këtu. Gjithçka duket e projektuar për të nxjerrë sa më shumë para”, ishte në thelb reagimi i Jordan.
Deklarata e tij ka shtuar diskutimet në rrjetet sociale, ku shumë tifozë kanë pyetur se përse Prenga nuk vazhdoi me të njëjtin agresivitet pasi e kishte vendosur Joshuan në vështirësi të mëdha gjatë raundit të parë.
Edhe në transmetimin e drejtpërdrejtë u vu në dukje se Prenga nuk ushtroi të njëjtin presion në raundin e dytë, pavarësisht avantazhit të madh psikologjik që kishte krijuar. Joshua përfitoi, avancoi përpara dhe e mbylli përballjen me një seri goditjesh të fuqishme.
Megjithatë, deri tani nuk është paraqitur asnjë provë zyrtare që ndeshja të ketë qenë e trukuar. Komentet e Simon Jordan dhe reagimet e tifozëve mbeten dyshime të ngritura mbi mënyrën e pazakontë se si ndryshoi dueli brenda vetëm një raundi.
Pavarësisht humbjes, Kristian Prenga tregoi fuqinë e tij, duke u bërë një nga të paktët boksierë që kanë arritur ta rrëzojnë dy herë Anthony Joshuan brenda të njëjtit raund. /InfoShqip-Givemesport.com
