Pas BDI-së, deklaratën për unifikim e qëndrimeve të partive politike shqiptare për pikat me të cilat shqiptarët do të hyjnë në qeverinë e re e ka mbështetur edhe Aleanca për Shqiptarët, shkruan Telegrafi Maqedoni.
”Aleanca për Shqiptarët në vazhdimsi ka mbështetur idenë e bashkëveprimit politik të subjekteve politike shqiptare, duke i unifikuar objektivat programore në një dokument të vetëm si bazament politik për të ardhmen politike të shqiptarëve të Maqedonisë.
Aleanca për Shqiptaret në gjithë këtë proces ka luajtur rol vendimtar, konstruktiv dhe parimor . Natyrisht që ne kemi vërejtjet tona por nuk mund të pretendojmë që një dokument i përbashkët i ndërtuar në frymën e konsensusit të përbashkët të përfshi vetëm Platformën tonë politike. Kontributi ynë në hartimin e këtij dokumenti të përbashkët të Partive politike shqiptare në Maqedoni ka qenë i domosdoshëm dhe përcaktues në interes të gjithë votuesve shqiptarë, duke i inkorporuar edhe pjesë të objektivave programore dhe politike të Aleancës për Shqiptarët.
Aleanca për Shqiptarët pas debateve dhe anlaziave të brendshme si dhe konsultimeve me Partitë që e përbëjne Aleancën për Shqiptarët, miratoi Deklaratën e përbashkët të partive politike shqiptare në Republikën e Maqedonisë.” thuhet në njoftimin e kësaj aleancë të përbërë nga LR-PDSH, UNITETI dhe RDK.