Kryetari i Kuvendit të Maqedonisë së Veriut, Afrim Gashi, ka uruar kryeministrin e Kosovës, Albin Kurti, për fillimin e mandatit të ri të Qeverisë së Kosovës.
Gashi bëri të ditur se në ditën e parë të punës së Qeverisë së re zhvilloi një bisedë telefonike me Kurtin, të cilit i përcolli urimet për mandatin e ri dhe suksese për Qeverinë Kurti 4.
“Uroj që ky mandat të sjellë rezultate të mira për qytetarët e Kosovës, forcim të institucioneve dhe vlerave demokratike, si dhe hapa të rinj drejt zhvillimit dhe integrimit europian”, shkroi Gashi.
Ai theksoi se gjatë bisedës është riafirmuar gatishmëria për vazhdimin e bashkëpunimit mes Maqedonisë së Veriut dhe Kosovës, duke vënë në pah lidhjet vëllazërore, fqinjësinë e mirë dhe interesin e përbashkët.
“Për Kosovën një faqe e re, për miqësinë tonë një vazhdim”, përmblodhi Gashi mesazhin e tij, duke shtuar se bashkëpunimi institucional mes dy vendeve është garanci për një të ardhme më të fortë dhe të përbashkët në rrugën europiane.
