Nënkryetari i Lidhjes Demokratike të Kosovës, Lutfi Haziri, ka hedhur disa akuza në drejtim të kryeministrit Albin Kurti në lidhje me arritjen e marrëveshjes së fundit me Serbinë për letërnjoftimet.
Haziri përmes një postimi në Facebook, ka thënë se kryeministri Kurti do të mbahet në mend për hapjen e Kosovës ndaj Serbisë.
Ai thotë se të gjithë kryeministrat tjerë e kanë hapur Kosovën në raport me Shqipërinë, me Maqedoninë e Veriut e me Malin e Zi, por Kurti ka formalizuar hapjen totale me Serbinë.
“I vetmi që e ka formalizuar hapjen totale ndaj Serbisë është Albin Kurti sepse të gjithë qytetarët e Kosovës të pakicës serbe të cilët kanë dy shtetësi, tani do t’i përdorin letërnjoftimet serbe për hyrje/dalje në të gjitha vendkalimet kufitare”, ka shkruar Haziri, përcjell Telegrafi.
“Kjo është ajo situata ëin-ëin që edhe Prishtina ndihet fituese në këtë marrëveshje sepse lehtëson hyrje-daljet e qytetarëve, e po ashtu edhe Beogradi ndihet fitues sepse ka detyruar që qytetarët e Kosovës të pakicës serbe kanë të drejtë ta kenë letërnjoftimin e Serbisë dhe të hyjnë e të dalin me dokument të Serbisë e jo të Kosovës”, shtoi tutje i dyti i LDK-së.
Ish-kryetari i Gjilanit ka thënë se kjo qeveri deri më tani asnjë çështje politike nuk e ka trajtuar në dialog.
“Pra, ky kryeministër e kjo qeveri kanë trajtuar e vazhdojnë të trajtojnë çështje teknike në dialog, e duke i përjashtuar çështjet politike”, përfundon shkrimi i Hazirit./Telegrafi/
