Hyrja në Kroaci që nga ky qershor është bërë dukshëm më e rreptë për shkak të zbatimit të plotë të rregullave të reja evropiane, raporton “Večernji list”. Nga 1 qershori 2026 ka filluar zbatimi i plotë i rregullave të reja evropiane në Kroaci, me ç’rast është bërë e detyrueshme dorëzimi i deklaratave të përmbledhura hyrëse (USD) për mallrat që me transport rrugor ose hekurudhor futen në territorin doganor të Bashkimit Evropian përmes zyrave doganore të hyrjes së parë në Kroaci.
Detyrimi për dorëzimin e deklaratës i takon kryesisht transportuesit, por ajo mund të dorëzohet edhe nga përfaqësuesi i tij, marrësi i mallit ose një person tjetër i autorizuar. Për dorëzimin e deklaratës, transportuesi, deklaruesi dhe përfaqësuesi duhet të kenë një numër aktiv EORI të regjistruar në Bashkimin Evropian.
Afatet për dorëzimin e deklaratës janë të paktën një orë para mbërritjes për transportin rrugor dhe një deri në dy orë për transportin hekurudhor.
Mosdorëzimi në kohë i deklaratës mund të shkaktojë vonesa dhe bllokime në procedurat e mëtejshme doganore.
Nga kjo obligim përjashtohet malli që ndodhet në bagazhin personal të udhëtarëve. Me bagazh personal nënkuptohen sendet personale të nevojshme për udhëtim dhe sendet për përdorim personal.
Gjatë hyrjes në BE nga vende të treta ekzistojnë përjashtime nga dogana, TVSH dhe akciza për mallra për përdorim personal deri në një vlerë të caktuar, në varësi të llojit të transportit.
Për transport ajror dhe detar kufiri është 430 euro, ndërsa për transport rrugor dhe hekurudhor është 300 euro, ndërsa për udhëtarët nën 15 vjeç 150 euro.
Përveç kësaj, ekzistojnë edhe kufizime për futjen e alkoolit dhe duhanit. Lejohen 40 cigare ose produkte ekuivalente të duhanit, 1 litër alkool i fortë ose 2 litra pije më të lehta alkoolike, si dhe 4 litra verë dhe 16 litra birrë.
Këto përjashtime nuk vlejnë për personat nën 17 vjeç.
Është e rëndësishme të theksohet se mallrat që transportohen në hapësirën e ngarkesës së automjeteve të destinuara për transport mallrash (material ndërtimor, mobilje, pajisje shtëpiake, pjesë rezervë etj.) nuk konsiderohen bagazh personal dhe i nënshtrohen procedurës së rregullt doganore.
Për udhëtarët që vijnë nga shumica e vendeve të treta, si Bosnja dhe Hercegovina, Serbia, Mali i Zi dhe Kosova, vlejnë kufizime të veçanta.
Nuk lejohet futja e mishit, qumështit dhe produkteve të tyre.
Megjithatë, lejohet të futen deri në 20 kilogramë peshk dhe produkte peshku për person.
Gjithashtu mund të futen deri në 2 kilogramë mjaltë, vezë dhe produkte të tjera me origjinë shtazore, si dhe deri në 2 kilogramë ushqim special për foshnja, ushqim mjekësor dhe ushqim për kafshë shtëpiake.
Buka, biskotat, çokollata, makaronat, suplementet ushqimore dhe produkte të ngjashme që plotësojnë kushtet e përcaktuara mund të futen për përdorim personal pa kufizime të veçanta sasiore.
Produktet që tejkalojnë sasinë e lejuar i nënshtrohen kontrollit veterinar dhe duhet të shoqërohen me dokumentacion përkatës.
Produktet me origjinë shtazore të padeklaruara ose të ndaluara konfiskohen dhe shkatërrohen, ndërsa udhëtari mund të gjobitet.
