Bosnjë-Hercegovina e ka marrë seriozisht lajmin se Sllovenia, e cila në korrik merr presidencën e Këshillit të BE-së, po kërkon ndarjen e vendit. Ambasadori slloven u thirr të hënën nga Ministria e Jashtme boshnjake për të sqaruar nëse vendi i tij i ka dorëzuar vërtet BE-së një propozim për shpërbërjen finale të Jugosllavisë.
Bosnjë-Hercegovina ishte pjesë e saj dhe u nda në Federatën Boshnjako-Kroate dhe në Republikën Srpska pas luftërave të 90-ës.
Tani udhëhiqet me rotacion nga tri presidentë. Sipas kryetarit kroat të presidencës, Zhelko Komshiç, në një bisedë joformale në muajin mars me homologun slloven, Borut Pahor, ky i fundit e kishte pyetur nëse do të ishte e mundur që Republika Srpska të shkëputej paqësisht.
Komshiç e kishte kundërshtuar bashkë me kryetarin tjetër boshnjak, ndërsa përfaqësuesi serb, Milorad Dodik, e kishte mirëpritur si ide.
Mediet lokale raportojnë se në të njëjtën kohë kryeministri slloven kontaktoi presidentin e Këshillit Europian, Sharl Mishel, për ta bërë realitet propozimin për ndryshimin e kufijve si të Bosnjë-Hercegovinës, edhe të Malit të Zi, Maqedonisë së Veriut, madje edhe Shqipërisë.
Por Sllovenia thotë se nuk e kërkoi këtë gjë.
“Presidenti Pahor në mënyrë të përsëritur është shprehur kundër idesë së shpërbërjes së Bosnjë-Hercegovinës dhe rivizatimit të kufijve të Ballkanit Perëndimor. Në këtë kontekt, dhe nga shqetësimi prej këtyre ideve, ai edhe u bëri pyetjen tre bashkëbiseduesve të tij gjatë vizitës në Sarajevë në muajin mars,” njoftoi zyra e presidentit slloven.
Edhe zëdhënësi i Këshillit Europian ka thënë se nuk është në dijeni të një dokumenti që kërkon shpërbërjen e Bosnjë-Hercegovinës, ndërsa përfaqësuesi serb i presidencës boshnjake ka paralajmëruar se ai personalisht mund të kërkojë një referendum pas një apo dy viteve, për statusin e Republikës Srpska.
