Bashkëkryetari i koalicionit VLEN, Bilall Kasami, ka theksuar se bashkimi i pesë subjekteve politike në një strukturë të vetme përfaqëson një hap të domosdoshëm drejt fuqizimit politik të shqiptarëve në Maqedoninë e Veriut.
Në një intervistë për Euronews, Kasami deklaroi se përvoja e kaluar e secilit subjekt politik ka dëshmuar se veprimi i ndarë nuk ka dhënë rezultatet e pritura, ndërsa bashkimi në një organizatë të vetme rrit kapacitetin për t’u përballur me sfidat që i presin shqiptarët në vend.
“Të gjithë jemi bashkë, në një zë, në një strukturë dhe në një organizatë. E kaluara jonë na ka mësuar se më mirë është të veprojmë së bashku sesa të tentojmë ndryshimin të ndarë”, theksoi Kasami.
Ai pranoi se procesi i bashkimit nuk ka qenë i lehtë, duke pasur parasysh se bëhej fjalë për pesë struktura të ndryshme partiake me organizime të veçanta, përfshirë kryesi qendrore, kuvende, degë dhe nëndegë. Megjithatë, sipas tij, këto struktura tashmë po unifikohen në një organizim të vetëm politik.
Kasami shtoi se qëllimi kryesor i partive politike është fitimi i besimit të qytetarëve dhe përfaqësimi i tyre në qeveri, duke vlerësuar se modeli i bashkimit në një subjekt të vetëm është rruga më efikase për të arritur këtë synim.
Sipas tij, VLEN synon të paraqitet si një alternativë e re politike që reflekton unitetin dhe përfaqësimin e denjë të shqiptarëve në Maqedoninë e Veriut.
