Në Komunën e Gostivarit po materializohet një investim kapital nga Anglia me vlerë prej 20 milionë dollarësh. Bëhet fjalë për kompaninë “PRG Angli”, e cila tashmë ka vendosur të hapë fabrikën pas një viti hulumtim për prodhimin e materialeve biokompatibile me qëllim të hapjes së fabrikës për prodhimin e xeheve në fshatin Balindoll të Gostivarit, njoftoi sot me anë të një komunikate komuna e Gostivarit.
Fillimisht Komuna, siç citohet në njoftim, ia kishte mundësuar hulumtimin kompanisë, dhe ai ka rezultuar me sukses dhe është marrë vendim për planifikim afatgjatë të prodhimit në territorin e Komunës së Gostivarit.
Për këtë qëllim, sot kryetari i komunës Nevzat Bejta priti kryeshefin ekzekutiv të kompanisë “PRG Angli”, Raymond Power, i cili u falënderua për mbështetjen e parezervë në realizimin e këtij investimi.
Kompania “PRG Angli” tashmë ka bërë certifikimin e fabrikës dhe prodhimit. Në nivel botëror, aktualisht janë të certifikuara vetëm 29 fabrika të këtij drejtimi industrial, thuhet në komunikatë.
