Oda Ekonomike e Maqedonisë Veriperëndimore vitin 2023 e përmbylli me organizimin e ngjarjes tradicionale të saj TOP-100 për të trembëdhjetën herë radhazi, duke e kremtuar së bashku suksesin e kompanive në vend, si dhe kontributin e tyre për rritjen dhe zhvillimin ekonomik të vendit.
Kryetari i Odës Mendi Qyra, renditi problematikat me të cilat janë përballur kompanitë viteve të fundit, si pandemia me Covid19, kriza energjetike dhe largimin e fuqisë punëtore dhe emigrimin në masë nga vendi. E për këtë të fundit Qyra theksoi se kanë hartuar një propozim plan afatgjatë për të ruajtur perspektivën socio-ekonomike.
“Fatkeqësisht ky fenomen do të na përcjell edhe në vitin 2024 e tutje, prandaj ne si OEMVP kemi hartuar një plan afatgjatë 10 vjeçar, që do të ndihmojë vendin dhe shoqërinë tonë ta ruaj perspektivën e vet socio-ekonomike, duke luftuar këtë dukuri negative që po zbraz vendin dhe që rrezikon edhe shkatërrimin e ekonomisë, shëndetësisë, arsimit dhe shumë fusha tjera. Pa dyshim se zgjidhja e këtij problemi kërkon angazhim maksimal të të gjithë faktorëve relevantë në vendin tonë, për të arritur rezultatin e kërkuar.”– deklaroi Mendi Qyra, kryetar i OEMVP-së.
