Nafta shqiptare shitet jashtë, çmimi vendas në stratosferë (FOTO)

Ndërkohë që Alpetrol prodhoi, vetëm në prill, mbi 5 mijë ton, vagonët e trenit e largojnë çdo ditë jashtë naftën shqiptare

Shqipëria është një prej vendeve të pakta në Evropë me rezerva të naftës, e megjithatë vendi ynë mbetet një nga më të varfrit. Gjithashtu vendi ynë është një nga shtetet me çmimin më të lartë të naftës në botë. Prodhimi i naftës në vend gjatë muajve të fundit ka pësuar rritje.

Albpetrol arriti të prodhojë rreth 5 mijë ton naftë vetëm gjatë muajit prill në qendrat e prodhimit të naftës në Kuçove dhe në zonën e Gorisht-Kocul. Albpetrol raportoi se pas një ecurie të dobët në muajt e parë të vitit duket se prilli ka shënuar edhe kthesën dhe qendrat janë fokusuar tek rritja e prodhimit si një objektiv kryesor për vitin 2019 çka do të mbështetet edhe përmes rritjes së investimeve.

“Rezultatet e para kanë ardhur në Qendrën e Prodhimit të Naftës Gorisht, ku muaji Prill 2019 ka njohur një rritje prodhimi në masën 60 ton në krahasim me sasinë e programuar. QPN Gorisht përfshin vendburimet e Gorisht-Koculit; Amonicës dhe Karbunarës. Peshën kryesore në këtë vendburim e mban Gorisht-Koculi ku për muajin Prill 2019 janë prodhuar 2.883 ton naftë. Në total QPN Gorisht, sipas programit të muajit Prill, duhet të prodhonte 3.300 ton naftë dhe ka arritur të prodhojë 3.360 ton naftë.

Në tre muaj te parë të vitit prodhimi i naftës në këtë ndërmarrje ka rezultuar ndjeshëm më poshtë se programimi, duke krijuar një deficit prej 326 ton naftë, të cilat pritet të rikuperohen gjatë muajve në vijim” vlerëson Albpetrol. Kompania shtetërore e nxjerrjes dhe prodhimit të naftës nënvizon se përveç Qendrës së Prodhimit të Naftës Gorisht, që prodhoi 60 ton naftë më shumë, tashmë edhe situata në Kuçovë është stabilizuar. “Qendra e Prodhimit të Naftës Kuçovë ka arritur normën e parashikuar prej 1643 ton naftë në muaj. Në fillim të vitit kjo qendër rezultonte me 31 ton më pak.

Brenda një kohe të shkurtër dy qendrat kryesore të prodhimit të Albpetrol sh.a kanë stabilizuar situatën dhe kanë tejkaluar problemet që patën në muaj te parë të vitit” thuhet në njoftimin e kompanisë. Në fillim të majit kompania nxori në ankand mbi 75 mijë ton naftë bruto për ta shitur atë tek kompanitë e interesuar, një procedurë që duket se është në fazën e vlerësimit të ofertave.

Nafta shqiptare dërgohet jashtë shtetit

Pavarësisht rritjes së prodhimit të naftës vendase, kjo nuk përkthehet në të ardhura më të larta ekonomike për vendin, kjo pasi kompanitë koncesionare naftën shqiptare e largojnë jashtë vendit, duke përfituar miliona para për xhepat e tyre, dhe duke i lënë në varfëri shqiptarët. Së fundmi në media janë bërë publike disa imazhe që tregojnë vagonë të tërë trenash të mbushur me naftë, të cilët e largojnë atë jashtë vendit.

Një nga pasuritë më të mëdha kombëtare të Shqipërisë, jo vetëm që i vidhet vendit, por shqiptarët nuk përfitojnë asgjë, pasi kontratat e shtetit me koncesionarët u kanë dhënë mundësinë e pasurimit vetëm një grupi njerëzish, dhe në fund ata që e pësojnë janë si gjithnjë qytetarët e thjeshtë, të cilët vijojnë të paguajnë çmimin nga më të shtrenjtët në botë për naftën.

FOTO:


PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu