Shuhet shkrimtari dhe politikani i njohur, Teodor Laço. Diplomati dhe ish-ministri i Kulturës në vitet ’94- ‘97 ndërroi jetë mëngjesin e së shtunës në moshën 80-vjeçare.
Homazhet në nderim të tij pritet të mbahen mesditën e nesërme në Ministrinë e Kulturës.
Ai lindi më 29 shtator të 1936 në Dardhë të Korçës. Pavarësisht se studioi për agronomi në universitetin e Tiranës, Laço ndoqi pasionin e tij për letërsinë, dhe nisi të botojë që në vitet ’60.
Është autor i shumë romaneve, novelave, përmbledhjeve me tregime, dramave, komedive, skenarëve të filmave artistikë dhe dokumentarë. Një pjesë e librave të tij janë përkthyer e botuar edhe në gjuhë të huaja.
Pas viteve ’90 është angazhuar edhe në jetën politike të vendit. Për 12 vjet ka qenë deputet në parlamentin shqiptar, ministër i Kulturës në vitet ’94-’97 dhe ka përfaqësuar shtetin shqiptar si ambasador në Federatën Ruse.
