Sistemet e mbrojtjes ajrore të Greqisë vendosën një “objektiv” radar mbi avionët turq që fluturonin një mision zbulimi mbi Mesdhe, në një lëvizje që rregullat e NATO-s e përshkruajnë si një “akt armiqësor”, raportoi CNN Turk, transmeton InfoShqip.
Sipas medias, avionët turq F-16 po operonin në Detin Egje dhe Mesdheun Lindor në hapësirën ajrore ndërkombëtare më 23 gusht, kur ata u kapën nga një sistem i mbrojtjes ajrore S-300 i prodhimit rus, i vendosur në ishullin e Kretës.
Avioni turk përfundoi misionin e tij dhe u kthye i sigurt në bazën e tij, por veprime të tilla konsiderohen “armiqësore” sipas rregullave të angazhimit të NATO-s, vëren CNN Turk.
Mediat turke e cilësuan incidentin si “të papajtueshëm me frymën e aleancës”, duke pasur parasysh se edhe Turqia edhe Greqia janë anëtarë të NATO-s.
Turqia dhe Greqia ankohen prej dekadash se avionët në anën tjetër po cenojnë integritetin territorial të njërit prej fqinjëve dhe deri më tani janë regjistruar mijëra incidente ajrore mes dy vendeve./InfoShqip.com
