Nënkryetarja e VLEN-it dhe deputetja në Kuvendin e Maqedonisë së Veriut, Mimoza Musa, ka shprehur solidaritetin e saj me studentët në Shqipëri, në lidhje me protestat dhe tensionet që i kanë shoqëruar ato, shkruan InfoShqip.
Përmes një postimi në Facebook, Musa ka shprehur shqetësimin për pamjet e dhunës, duke theksuar se asnjë i ri nuk duhet të ndihet i pasigurt kur kërkon të drejtat e tij.
Ajo ka nënvizuar se institucionet kanë përgjegjësi të garantojnë sigurinë dhe dinjitetin e studentëve, ndërsa ka bërë thirrje që zëri dhe shqetësimet e tyre të dëgjohen e të merren seriozisht.
Statusin e plotë të Mimoza Musës në Facebook mund ta lexoni në vazhdim:
“Tirana sonte na sjell pamje që dhembin… 💔
Është e vështirë të shohësh të rinj, studentë me ëndrra dhe shpresa, të përballen me dhunën teksa kërkojnë të drejtat e tyre. Pas secilit prej tyre qëndron një familje që i ka rritur me dashuri, me sakrifica dhe me shpresën për një të ardhme më të mirë.
Asnjë prind nuk duhet të ketë frikë për fëmijën e tij vetëm sepse ai ngre zërin. Asnjë student nuk duhet të ndiejë pasiguri kur kërkon të drejtat e tij.
Studentët janë e ardhmja jonë. Zëri i tyre duhet të dëgjohet, shqetësimet e tyre të merren seriozisht dhe dinjiteti i tyre të respektohet. Institucionet kanë përgjegjësi të garantojnë sigurinë e tyre dhe të reagojnë me përgjegjësi.
Sot, më shumë se kurrë, studentët kanë nevojë për solidaritetin tonë. Sepse të mbrosh të rinjtë do të thotë të mbrosh shpresën, dinjitetin dhe të ardhmen e një shoqërie.
Asnjë ëndërr e një të riu nuk duhet të përballet me dhunën. Asnjë zë nuk duhet të heshtet nga frika.
Solidaritet me studentët e Shqipërisë! 🇦🇱❤️“, shkruan Musa në profilin e saj në Facebook. /InfoShqip.com
