Simon Charles Dorante-Day i cili pretendon se është fryti i dashurisë së Mbretit Karli III dhe bashkëshortes së tij Camilla është ndjerë i ofenduar pasi William mori titullin Princi i Uellsit.
Inxhinieri nga Queensland, 56 vjeç, u birësua në moshën tetë muajshe dhe pohon se gjyshja e tij birësuese i tha atij në shtratin e vdekjes se ai ishte ‘djali i fshehtë’ i Mbretit Karl dhe Camillës.
Ai ka folur prej vitesh për dëshirën e tij që anëtarët e familjes mbretërore t’i nënshtrohen një testi ADN-je për të vërtetuar se ai është tashmë trashëgimtari i fronit.
Ai tashmë po këshillohet me ekspertë të lartë ligjorë, pasi nuk mori një përgjigje nga Mbretëresha Elisabeth II, ndërsa i tregoi situatën me anë të një letre.
“Nuk dua të ndihem kështu, por po. Thjesht mendoj, më e pakta që mund të bëjë Charles është të më japë një përgjigje. Ai i jep Williamit një titull të tillë, mirë ku është përgjigja ime? Ku është testi im i ADN-së? Nëse nuk je babai im, atëherë provo që nuk je”, tha ai.
Simon theksoi se do të ndiqte veprime ligjore për të detyruar Mbretin të kryejë testin e atësisë.
“Ka pasur një diskutim midis një gjyqtari, meje dhe avokatit të tij në lidhje me pozitën ligjore të Charles, dhe nëse monarku mbrohet nga ligji apo është mbi ligjin“, shpjegoi Dorante-Day.
“Dhe përgjigja për këtë ishte jo – ata më thanë se ne nuk shohim ndonjë arsye pse ai është. Dhe së dyti, Camilla dhe familja e saj sigurisht nuk janë mbi ligjin”.
Dorante-Day lindi në Portsmouth të Mbretërisë së Bashkuar më 5 prill të vitit 1966 dhe u birësua në moshën tetë muajshe përpara se familja e tij të vendosej më vonë në Australi.
Të dy gjyshërit birësues të Dorante-Day kishin punuar për Mbretëreshën dhe Princin Philip në një nga familjet e tyre mbretërore dhe ai pretendon se gjyshja e tij birësuese i tha se ishte djali i Charles dhe Camilla.
Dorante-Day pretendon se Mbreti Karl dhe bashkëshortja e tij Camilla filluan marrëdhënien e tyre në vitin 1965, një vit para se ai të lindte.
Ai pretendon se Camilla mungoi në daljet e saj publike dhe Mbreti Karl u dërgua në një udhëtim në Australi nëntë muaj para se të lindte.
Dorante-Day këmbëngul se Camilla e mbajti atë deri në moshën tetë muajshe, duke e fshehur nga bota me ndihmën e familjes mbretërore dhe oficerëve të mbrojtjes dhe pretendon se i ishte thënë se ishte kusht i birësimit që emrat e tij Simon dhe Charles nuk u ndryshuan.
Megjithatë, pas tetë muajsh ai po bëhej shumë i madh për t’u fshehur dhe ishte rregulluar që vajza e një anëtari të stafit të familjes mbretërore, pikërisht gjyshja birësuese e Dorante-Day ta merrte atë nën kujdesin e saj.
Dorante-Day beson se mospërputhjet në certifikatën e tij të lindjes dhe emri i tij gjithashtu dëshmojnë se ai është me gjak mbretëror.
Por afati kohor i ngjarjeve kundërshton të dhënat zyrtare që thonë se Mbreti i ri dhe Camilla u takuan pesë vjet pas lindjes së Dorante-Day.
