Në këtë konferencë për media të ministres për punë dhe politikë sociale, Rashella Mizirahi, nuk kishte asnjë tabelë, për të cilën në ditët e mëparshme kishte përplasje politike. Ishte vendosur vetëm flamuri i vendit dhe ai i BE-së.
Pas Marrëveshjes së Prespës dhe ndryshimeve kushtetuese, ish-ministrja, Milla Carovska, konferencat për media i mbante me vendosjen e banerit ku shkruante Republika e Maqedonisë së Veriut. Tabela nuk është ndryshuar, vetëm është mbuluar me banerë, ku shkruan Republika e Maqedonisë së Veriut, Ministria për punë dhe politikë sociale.
Ku është baneri dhe pse ministrja e tanishme teknike për punë dhe politikë sociale nuk e shfrytëzon? Ajo thotë se nuk ka gjetur asnjë baner dhe se nuk ka për qëllim për ta ndryshuar tabelën.
“Unë nuk kam hequr asnjë baner, ju jeni këtu që ditën e parë. A keni parë ndonjëherë ndonjë baner. Unë nuk do të vendos asnjë baner. Kjo është tabela e ministrisë dhe para kësaj tabele do të mbahen konferencat për media në këtë ministri”, Mizrahi.
Përveç kushtetutës, Mizrahi e shkel edhe Ligjin e gjuhëve për shkak se shkrimi i tabelës nuk është i përkthyer në gjuhën shqipe, ndërsa sipas këtij ligji, gjithë shkrimet e institucioneve shtetërore duhet të jenë në të dy gjuhët.
“Dënimi është 5 mijë euro. Në rregull, mirë, unë do të dënohem. Unë do të dënohem”, theksoi Mizrahi.
Para disa ditëve ministri për punë të jashtme, Nikolla Dimitrov, kërkoi shkarkimin e Mizrahit, për shkak të, siç tha ai, mosrespektimit të Kushtetutës, ndërsa kryeministri teknik, Oliver Spasovski, paralajmëroi se do të bisedoj me të.
Nga ana tjetër, nga kabineti i zv.ministres shtesë, Sanella Shkriel, për TV21 thonë se në Ministri ka kushte për mbajtjen e konferencave për media në përputhje me Kushtetutën. Shtojnë se shfrytëzimi i tabelës së vjetër të MPPS është bërë me vetëdije dhe me qëllim të qartë – të dërgohet porosi se nuk pajtohet me Marrëveshjen e Prespës dhe me realitetin e ri të RMV.
Ndryshe, Mizrahi e akuzoi ish-ministren për punë dhe politikë sociale, Milla Carovskën, për, siç tha, shkelje flagrante të Rregullores për punë të Këshillit Ekonomiko-Social. Sipas Mizrahi, në seancën e 35 të këshillit, Milla Carovska ka kërkuar të sillet pikë shtesë në rendin e ditës për ndryshimin e Rregullores për punë, gjë që e kanë kundërshtuar anëtarët e sindikatave që kanë qenë prezente dhe janë prononcuar se nuk kanë qenë të njoftuar për ndryshime në rend të ditës e më pas janë larguar nga seanca.
Gjatë ditës disa herë u munduam të marrim qëndrim nga ish-ministrja për punë dhe politikë sociale, që tani është zv.kryeministre për çështje ekonomike, Milla Carovska, por pa sukses.
