Ish-përfaqësuesi i lartë i BE -së, Havier Solana në fjalimin e tij në këtë shënim të 20-vjetorit, tha se është i bindur që shumë shpejt, Shkupi do t’i nisë bisedimet për anëtarësim në BE. Në pamundësi që të ishte i pranishëm në manifestim mesazhin e tij e përcolli me video-incizim.
Ish-përfaqësuesi i NATO-s, Piter Fejth, porositi se Marrëveshja e Ohrit është mjaft e veçantë. Ndërkaq zëvendës ndihmësi i sekretarit të përgjithshëm të Aleancës, Xhejms Apatura, tha se NATO-ja do të vazhdojë me dialog politik dhe bashkëpunim praktik me vendet nga Ballkani Perëndimor për mbështetje të përpjekjeve për reforma dhe promovim të paqes rajonale dhe sigurisë. E nga ana tjetër, ambasadorja e SHBA Kejt Meri Bërnz dhe Eduard Prajs zëdhënës i Departamentit të Shtetit, theksuan se Ohri dhe Prespa e dërguan vendin në NATO dhe në prag të BE-së.
“Keni pasur shumë vështirësi në udhëtimin tuaj. Keni pasur vështirësi me zgjidhjen e emrit tuaj, por ka pasur rezultate. Ju keni pasur probleme me gjuhën tuaj, e cila gjithashtu është zgjidhur dhe keni nisur negociata pas marrëveshjes me NATO–n, jam i sigurt që së shpejti do të keni mundësinë për të filluar bisedimet zyrtare me Bashkimin Evropian”, deklaro Solana.
“Do të doja të lëvdoja qytetarët e këtij shteti për punën që e kanë bërë, për tolerancën. Mendoj se të gjitha komunitetet do të jenë në paqe dhe komod duke jetuar nën të njëjtin kulm me identitetin kulturor”, tha Fejth.
