Pamje dhe detaje që tregojnë se “ku po e çon Rusia grurin e vjedhur të Ukrainës” (VIDEO)

Forcat ruse janë akuzuar vazhdimisht për vjedhjen e grurit nga fermerët ukrainas në zonat e pushtuara, si dhe kultura të tjera si farat e lulediellit, së bashku me plehrat dhe pajisjet bujqësore.

Në këtë drejtim, BBC thotë se ka folur me fermerët, ka analizuar imazhet satelitore dhe ka ndjekur të dhënat e gjurmimit për të kërkuar prova se ku po shkon gruri i vjedhur, përcjell Telegrafi.

Disa dhjetëra milje larg vijës së frontit, fermeri ukrainas Dmytro përshkruan se si biznesi që ai ushqeu mbi 25 vjet humbi në katër muaj të pushtimit rus.

Mediumi në fjalë thekson se u përpoq të kontaktonte më shumë se 200 fermerë, toka e të cilëve tani ndodhet në territorin e pushtuar nga Rusia.

Dmytro (emri i ndryshuar për ta mbrojtur nga hakmarrja” ishte një nga të paktët që dëshironte të fliste.

“Na vodhën grurin. Na shkatërruan hapësirat, na shkatërruan pajisjet”.

Ai thotë se forcat ruse tani pushtojnë 80% të dhjetëra mijëra hektarëve që ai kultivon dhe i akuzon ata për vjedhje të grurit në shkallë industriale.

Pamjet e kamerave të vëzhgimit nga një prej hapësirave ka kapur momentin kur mbërritën rusët.

Nga të dhënat GPS, të dy kamionët ndaluan pranë një magazinimi – të identifikuar si një vend për shkarkimin dhe ruajtjen e grurit – në qytetin Oktyabrske të Krimesë.

Në një imazh satelitor nga 14 qershori i këtij viti – mund të shihni një varg kamionësh në rrugën pranë objektit.

Siç vë në pah më tej BBC, përcjell Telegrafi, është shumë e vështirë të gjurmosh dërgesat individuale të grurit të vjedhur, por ka shumë prova që shumica e tyre shkojnë së pari në Krime.

Ka imazhe satelitore në dy pika kyçe hyrëse – në Chonhar dhe Armiansk – në të cilat mund të shihni një grumbullim automjetesh, të cilat mund të përdoren për të transportuar grurë dhe prodhime të tjera.

Një imazh nga pika e hyrjes në Chonhar më 17 qershor tregon një linjë kamionësh më shumë se 5 km të gjatë.

Gjithashtu, imazhet satelitore të qytetit të Dzhankoi në Krime tregojnë kamionë që presin në një rrugë pranë një objekti të depozitimit të grurit dhe pranë stacionit të trenit.

Veç tjerash, BBC shkruan se ka marrë gjithashtu dokumente të hartuara nga autoritetet pushtuese ruse që listojnë fermat ku do t’u transferohet gruri.

Një hetim i veçantë nga BBC Russian dhe BBC Ukrainian ka treguar se në disa raste, rusët po i detyrojnë fermerët ukrainas të shesin drithë me çmime shumë më të ulëta se çmimet e tregut dhe të nënshkruajnë dokumente për të vërtetuar se është blerë “ligjshëm”.

Ndërsa raportet e hershme ishin zakonisht për vjedhje të drejtpërdrejtë nga forcat ruse, fermerët sugjerojnë se ka pasur një ndryshim në taktika pasi rusët e kuptojnë se nëse nuk paguajnë asgjë, të korrat e ardhshme mund të sabotohen.

Fermerët thonë se duhet të pranojnë çmimet e ulëta pasi nuk kanë alternativë dhe duhet të blejnë karburant dhe të paguajnë punëtorët.

Emilie Pottle, një avokate e së drejtës ndërkombëtare, i tha BBC-së se këto veprime mund të shkelin Konventën e Gjenevës dhe rregullat e Gjykatës Penale Ndërkombëtare (ICC) që rregullojnë fuqitë okupuese. /Telegrafi/

VIDEO:


PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu