Pamjet që vijnë nga spitalet e Larisës, ku janë transportuar dhjetëra të plagosur pas aksidentit tragjik të trenave në luginën e Tempes, është zemërthyese.
Sipas informacioneve të GrTimes, deri më tani Spitali i Përgjithshëm i qytetit numëron 14 të vdekur dhe 20 të plagosur. Njëri prej tyre është transferuar në Spitalin Ushtarak, i cili është në gadishmëri që nga mbrëmje e djeshme.
Ajo që e bën edhe më tragjike këtë ngjarje është fakti se shumica e të vdekurve sipas mediave helene janë studentë.
Ndërkohë në Spitalin Universitar janë transferuar trupat e 9 personave dhe 48 të plagosurve, prej të cilëve dy janë të intubuar në terapi intensive dhe janë në gjendje kritike për jetën.
Gjithashtu, duhet theksuar se mes të plagosurve janë dy fëmijë përkatësisht 7 vjeç dhe 9 muajsh, të cilët mësohet se kanë mbetur të plagosur lehtë nga kjo përplasje.
“Përplasja ishte shumë e fortë. Një fëmijë që po qëndronte në këmbë ra pesë ulëse mbrapa, ne dolëm normalisht sepse kishim rrymë. Skena e parë që mbaj mend është nuhatja e djegies. Nxora kokën dhe pashë flakë të mëdha dhe dëgjova zëra nga kudo pa kuptuar se kush po thoshte çfarë”, tha për mediat një pasagjer i trenit që ishte në vagonin e fundit.
Ndërkaq të afërmit e pasagjerëve të trenit fatal janë mbledhur jashtë spitalit që në orët e para të mëngjesit në pritje për të mësuar disa lajme për njerëzit e tyre.
