Turqia nuk do të japë pëlqimin e saj për pranimin e Suedisë dhe Finlandës pa marrë “masa konkrete” nga të dy vendet në lidhje me shqetësimet e saj të sigurisë, paralajmëroi Ibrahim Kalin, një zëdhënës i presidencës turke dhe një bashkëpunëtor i ngushtë i Erdoganit.
Kalin priti delegacione nga diplomatët e të dy vendeve të dërguara në Turqi në përpjekje për të bindur Ankaranë, e cila kundërshton anëtarësimin e tyre në Aleancën Atlantike.
“Ne ua kemi bërë të qartë bashkëbiseduesve tanë se procesi (i anëtarësimit në NATO) nuk mund të vazhdojë derisa të plotësohen shqetësimet e sigurisë së Turqisë, me masa konkrete dhe brenda një afati të caktuar”, tha ai në fund të bisedimeve. Takimi zgjati pesë orë.
“Bashkëbiseduesit tanë janë informuar dhe tani do ta përcjellin (raportin e tyre) tek qeveritë e tyre. Ne do të vazhdojmë bisedimet kur të marrim përgjigjet e tyre për kërkesat tona”, shtoi Kalin.
Turqia akuzon vendet nordike, veçanërisht Suedinë, e cila ka një komunitet të madh të të mërguarve turq, se u ofron strehim luftëtarëve kurdë të PKK-së, Partisë së Punëtorëve të Kurdistanit, të cilën ajo e konsideron një organizatë terroriste.
Ajo denoncon gjithashtu praninë e mbështetësve të predikuesit Fethullah Gulen, të cilin e konsideron si kokën e grushtshtetit në korrik 2016.
Ankaraja u bëri thirrje të dy vendeve që të “marrin hapa konkretë” në lidhje me “praninë e organizatave terroriste në nivelet organizative, financiare dhe mediatike”, shtoi Kalin.
Zëdhënësi përsëriti gjithashtu kërkesat e Ankarasë për ekstradimin e individëve që ajo beson se janë të lidhur me PKK-në ose lëvizjen Gulen.
Kalin tha gjithashtu se ishte optimist për heqjen e kufizimeve të vendosura nga Stokholmi për eksportet e armëve në Ankara, të cilat u miratuan në tetor 2019 pas operacionit të atëhershëm ushtarak turk në Siri.
“Ne kemi vërejtur një qëndrim pozitiv,” tha ai, duke shtuar se “nuk është e përshtatshme të vendosen sanksione ndaj aleatëve”- tha ai.
