Ministria e Punëve të Brendshme (MPB) në Maqedoninë e Veriut u bën thirrje qytetarëve të jenë veçanërisht të kujdesshëm për shkak të sulmeve të shpeshta përmes SMS-ve dhe email-eve të rreme, në të cilat mashtruesit paraqiten si sistemi “Qyteti i Sigurt” (Safe city).
Siç informojnë nga MPB-ja, mesazhet e rreme përmbajnë një njoftim për një shkelje të supozuar të rregullave të trafikut. Në to është vendosur një vegëz (link) e rreme përmes së cilës kërkohet nga qytetarët të kryejnë një pagesë.
Nga Ministria theksojnë se qëllimi i këtyre mesazheve është vjedhja e të dhënave personale dhe financiare, prandaj qytetarët nuk duhet të hapin vegëza të dyshimta dhe as të vendosin informacione të ndjeshme.
“U bëjmë thirrje qytetarëve që asnjëherë të mos mefshijnë të dhëna personale, siç janë numrat e kartelave bankare, fjalëkalimet apo identifikuesit personalë përmes kanaleve të paautorizuara. Është e nevojshme të kontrollohet gjithmonë adresa e dërguesit, pasi institucionet zyrtare përdorin domene zyrtare, si dhe të përdoret mefshimi me dy faktorë (2FA) për mbrojtje shtesë të llogarive të përdoruesve”, njoftoi MPB-ja.
Si t’i dalloni mesazhet zyrtare?
Nga Ministria e Brendshme sqarojnë se njoftimet e vërteta me SMS për shkeljet e rregullave të trafikut mbërrijnë ekskluzivisht nga:
Dërguesi siç shkruan: MVR-SC
Përmbajtja: Përmbajnë detyrimisht targën e automjetit
Vegëza (linku): Fillon me https://safecountry.mvr.gov.mk
Po ashtu, qytetarët ftohen që të gjitha mesazhet e dyshimta t’i raportojnë në institucionet kompetente ose në bankën e tyre, nëse dyshojnë se të dhënat e tyre janë komprometuar.
Nga Sektori për Krim Kompjuteri pranë MPB-së informojnë se po vazhdojnë me hetimet dhe po marrin masa për zbulimin dhe sankcionimin e kryerësve të këtyre mashtrimeve në internet.(INA)
