Kryeministri i Shqipërisë Edi Rama bëri të ditur se dy satelitët që do të dërgohen në hapësirë janë gati për nisje. Rama shkruan në rrjetet sociale se “dy sytë superteknologjikë” që do të monitorojnë Shqipërinë nga lartësitë, me saktësi të lartë dhe qartësi të plotë të imazhit deri në 75 cm2, satelitët “Albania 1” dhe “Albania 2” janë gati të të lëshohet në hapësirë nga qendra hapësinore Kennedy në Florida, SHBA, transmeton InfoShqip.
“Shqipëria do të ketë të drejtën e saj ekskluzive të përdorimit, për përpunimin e informacionit gjeohapësinor (GIS), si dhe për ofrimin e produkteve imazherike dhe përbërësve të tjerë të tyre, për një sërë institucionesh dhe subjektesh, publike apo private, puna e të cilëve ka të bëjë në territor, shpie, pyje, zjarre, mbetje urbane, prodhim bujqësor, zhvillim urban, dokumente pronësie etj. Revolucioni dixhital. Shqipëria e ardhmja jonë. Nuk ka kohë për të pushuar”, shkruan Rama.
Së bashku me Elon Musk, kryeministri pritet të shtypë butonin e lëshimit për dy satelitët e parë nën flamurin shqiptar në dhjetor.
Agjencia Kombëtare Shqiptare për Mbrojtjen Civile dhe operatori “Satellogic USA Inc”, në qeverinë në Tiranë, në fund të muajit të kaluar nënshkruan një kontratë për një shërbim satelitor në fushën e mbrojtjes dhe sigurisë për monitorimin me teknologji të avancuar në territor të Republikës së Shqipërisë.
“Një kryeinspektorat në parajsë që do t’i ketë sytë në të gjithë territorin e shtetit, i cili nuk do të ketë as parti, as kushërinj, as privilegje. Me satelitët nuk do të mund të ndërtohet më pa leje, sepse satelitët do të mund të shohin çdo vëllim të ngritur në sipërfaqen e tokës“, tha ndër të tjera kryeministri Edi Rama pas nënshkrimit të marrëveshjes.
Kontrata kap vlerën e gjashtë milionë dollarëve dhe konsiston në përdorimin ekskluziv të dy satelitëve për një periudhë trevjeçare./InfoShqip.com
