SHBA dhe fuqitë e tjera perëndimore i shtuan përpjekjet e tyre për evakuim pasi Presidenti amerikan Joe Biden njoftoi se afati i 31 gushtit për largimin nga Afganistani nuk do të zgjatet, transmeton InfoShqip.
Biden thotë se Shtetet e Bashkuara janë “në prag” të përmbushjes së afatit të evakuimit të 31 gushtit nga Afganistani, pavarësisht thirrjeve të mëparshme nga aleatët për të zgjatur atë afat.
Disa ushtarë amerikanë tashmë janë tërhequr, raportojnë mediat amerikane, transmeton Fena.
Të paktën 82,300 njerëz u larguan nga Kabuli, i cili u pushtua nga talebanët nëntë ditë më parë.
Talibanët refuzuan të zgjasin periudhën e evakuimit.
“Talibanët kanë ndërmarrë hapa për t’i nxjerrë njerëzit tanë jashtë,” tha Biden, duke shtuar se bashkësia ndërkombëtare do t’i gjykojë talebanët bazuar në veprimet e tyre.
“Askush prej nesh nuk do t’i pranojë talebanët sipas fjalës së tyre,” shtoi ai.
Presidenti amerikan tha se trafiku ajror duhet të përfundojë së shpejti për shkak të kërcënimit në rritje nga anëtarët e Shtetit Islamik në Irak dhe Levant (ISIL) në Afganistan.
Talibanët më parë kishin kërkuar nga të huajt që të ndalonin evakuimin e “ekspertëve afganë” si inxhinierë dhe mjekë nga vendi.
Banka Botërore që atëherë ka pezulluar ndihmën për Afganistanin dhe ka ngrirë qindra miliona dollarë në fonde.
Agjencitë ndërkombëtare të ndihmës paralajmërojnë për rreziqet e urisë dhe sëmundjeve, dhe David Beasley, drejtor ekzekutiv i Programit Botëror të Ushqimit të Kombeve të Bashkuara (WFP), pretendon se 14 milionë njerëz nuk kanë ushqim të mjaftueshëm.
Një reporter i Al Jazeera raporton se talebanët kanë ngritur pika kontrolli pranë aeroportit dhe po parandalojnë afganët të hyjnë në objekt. /InfoShqip.com
