Turqia është kthyer në një vend model, politikat e së cilës u japin shpresë miliona njerëzve në rajonin e saj, sipas ministrit të Brendshëm të vendit. Duke folur për një kanal privat të lajmeve “A Haber” mbrëmë, Süleyman Soylu tha se Turqia, nën udhëheqjen e presidentit Recep Tayyip Erdoğan, hartoi rrugën e saj përpara sfidave dhe pasigurive të rendit të ri botëror.
Në luftën e Turqisë kundër grupit terrorist PKK, Soylu theksoi kontributin e rëndësishëm të arritur nga produktet e mbrojtjes të bëra nga Turqia, si dronët dhe helikopterët luftarakë ATAK.
Në fushatën e saj terroriste më shumë se 30-vjeçare kundër Turqisë, PKK e renditur si grup terrorist nga Turqia, SHBA-ja dhe Bashkimi Evropian, ka qenë përgjegjëse për vdekjet e të paktën 40 mijë njerëzve, përfshirë shumë gra, fëmijë dhe foshnja.
Duke iu referuar pretendimeve për lidhjen e Partisë Demokratike të Popujve (HDP) me organizatën terroriste PKK, Soylu tha se terroristët e dorëzuar shpesh rrëfejnë për marrëdhëniet e drejtpërdrejta dhe organike midis partisë politike dhe grupit terrorist.
“Përfshirja e disa deputetëve parlamentarë dhe shumë zyrtarëve të HDP-së në rekrutimin e terroristëve për grupin është e qartë“, shtoi ai. Qeveria turke ka akuzuar prej kohësh HDP-në për lidhjet me organizatën terroriste PKK.
Për sa i përket organizatës terroriste FETO, grupi e cila qëndron pas grushtit të shtetit të mposhtur të viti 2016, Soylu tha se që nga viti 2016, të paktën 137 anëtarë të lartë të FETO-s nga 31 vende të ndryshme u sollën në Turqi.
“Burimet financiare të grupit janë tkurrur jashtëzakonisht shumë. Ata tani janë ndarë në katër ose pesë fraksione të ndryshme që po luftojnë me njëri-tjetrin për të marrë kontrollin e gjithë grupit“, shtoi ai.
