Pas deklaratës së kreut të Besës Bilall Kasamit, se eksponentë të Aleancës për Shqiptarët do t’i bashkëngjiten lëvizjes, kreu i ASH-së Arben Taravari i hodhi poshtë këto pretendime duke thënë madje se deri tani në Aleancë kanë ardhur nëntë nëndegë të Besës.
“Unë e di se nëntë nëndegë të BESËS u bashkëngjiten në ASH në Gostivar dhe vazhdimisht kemi bashkëngjitje të anëtarëve të BESËS në Tetovë, se në vendet tjera nuk e di edhe ku ka BESA, por pa marrë parasysh, unë i uroj suksese Bilall Kasamit, shihemi në zgjedhje”, deklaroi Arben Taravari. Kryetar i ASH-së.
Ndej këtyre qëndrimeve reagoi kreu i Besës. Bilall Kasami tha se në ASH po ndodh një përçarje më e madhe se ajo e grupit të zjarrit të BDI-së.
“Sa iu përket largimeve dhe bashkëngjitjeve ai vetë e pranoi që ka mosmarrëveshje brenda strukturës së tij politike, e informatat që kemi ne nga komunikimet tona, ajo është shumë më shumë se grup zjarri. Sepse ASH votat i mori për të artikuluar zërin shqiptar. Është e pamundur që të bashkohet vota e ASH-së opozitare me votat e BDI-së që 20 vite janë në pushtet. Në zgjedhjet e fundit, ASH duke mos arritur të krijojë në aleancë të fuqishme opozitare i humbi zgjedhjet dhe tani si humbës, është pjesë e Qeverisë për të shpëtuar interesat e qeverisë edhe pse votat i mori në kauzë të kundërt nga kjo”, u shpreh Bilall Kasami. Kryetar i Lëvizjes BESA.
Përplasjet mes dy subjekteve nisën pas prishjes së koalicionit në nivel lokal dhe hyrjes së ASH-së në Qeveri. Krerët e dyja partive që drejtojnë Gostivarin dhe Tetovën filluan edhe largimin nga pozitat lokale të drejtuesve të sektorëve. /Alsat/
