Presidenti i SHBA-së, Donald Trump, deklaroi se është arritur një marrëveshje për çarmatimin e plotë të Hamasit dhe grupeve të tjera militante në Rripin e Gazës. Marrëveshja është pjesë e planit të paqes me 20 pika, i cili u prezantua vitin e kaluar.
“Ky është një hap kyç që Gaza më në fund të qeveriset nga një qeveri e re palestineze, e cila do të bashkëpunojë me Komitetin e Paqes për të ndihmuar popullin palestinez”, shkroi Trump në rrjetin e tij social “Truth Social”.
Ai shtoi se, në të njëjtën kohë, “Izraeli do të marrë sigurinë që meriton, ndërsa Gaza nuk do të përdoret më si bazë për sulme terroriste”.
Edhe Bordi i Paqes, një organizatë ndërkombëtare e krijuar si pjesë e planit për përfundimin e luftës, konfirmoi se Hamasi “ka pranuar një plan të detajuar për zbatimin e fazave të ardhshme të armëpushimit në Gaza”. Sipas Bordit të Paqes, marrëveshja është rezultat i negociatave disamujore.
Trump e cilësoi marrëveshjen, e cila do të zbatohet në disa faza, si një kthesë të madhe.
“Kur të përfundojë çarmatimi, forcat izraelite do të tërhiqen, ndërsa Forcat Ndërkombëtare të Stabilizimit do të bashkëpunojnë me policinë e re palestineze për të garantuar që Gaza të jetë e sigurt për banorët e saj dhe fqinjët e saj”, tha Trump.
Ai shtoi se, sipas marrëveshjes, Rripi i Gazës “më në fund do të jetë në duart e një qeverie të re palestineze, e cila do t’i shërbejë popullit të saj”.
Megjithatë, detajet e marrëveshjes për çarmatimin nuk janë bërë publike. Izraeli dhe Hamasi ende nuk kanë komentuar zyrtarisht deklaratat e Trumpit.
Plani i paqes me 20 pika, i prezantuar vjeshtën e kaluar, tashmë ka çuar në një armëpushim dhe në shkëmbimin e pengjeve izraelite me të burgosur palestinezë. Lufta nisi më 7 tetor 2023, pas sulmit terrorist të Hamasit ndaj Izraelit, ku u vranë rreth 1.200 izraelitë. Më pas, Izraeli ndërmori një ofensivë të gjerë ushtarake ndaj enklavës palestineze, ndërsa sipas Ministrisë së Shëndetësisë në Gaza, në luftë kanë humbur jetën mbi 70.000 palestinezë.
