Arba Kokalari, eurodeputetja e Suedisë në Parlamentin Europian dhe e para eurodeputete shqiptare mori sot dhjetra urime nga personalitete të politikës në Shqipëri.
Ndër ta edhe ish-kryeministri Sali Berisha, i dërgoi asaj urime të përzemërta për përzgjedhjen si eurodeputete.
Arba është mbesa e intelektuales, disidentes dhe patriotes gjirokastrite Musine Kokalarit. Ajo është vajza e Bardhyl Kokalarit, ish-ambasador i Shqipërisë në Stokholm në vitin 1992, kur Arba ishte vetëm 6-vjeçe.
Bardhyl Kokalari do të akuzohej pak vite më pas nga shkrimtari i famshëm Ismail Kadare se kishte shkruar letra jurisë së Çmimit Nobel kundër tij.
“Një ish-ambasador i Shqipërisë në Suedi, ka kundërshtuar nominimin tim me këtë çmim. Ky ishte një veprim skandaloz, saqë edhe vetë shtypi u mor gjatë me këtë çështje. E ç’është më e keqja, ai ambasador ishte nga Gjirokastra”, tha Kadare në vitin 2008.
Por megjithëse Bardhyl Kokalari nuk i pranoi kurrë akuzat, flitet se Kadare i kërkoi Sali Berishës ta shkarkonte nga posti që mbante. Dhe Berisha ashtu bëri. Kokalari pas shkarkimit u kthye në Stokholm ku aplikoi dhe u pranua për që qëndruar aty.
