Lëvizja BESA e krahut të Afrim Gashit e ka akuzuar Bilall Kasamin se ka falsifikuar dokumente në periudhën pas zgjedhjeve lokale të 15 tetorit. Orhan Murtezani tha se posedojnë dëshmi se Kasami ka dorëzuar në Gjykatën e Shkupit emra të rrejshëm për kryetarë degësh të partisë, sipas tij, me çka ka dashur që të krijojë shumicë fiktive në Këshillin qendror të partisë.
“Ne kemi hulumtuar në dosjen e Lëvizjes BESA në gjykatë dhe kemi gjetur të ashtuquajtura dokumente që ish-kryetari i ka falsifikuar. Në fakt menjëherë pas mbarimit të zgjedhjeve lokale, atëherë kur ai e bllokonte funksionimin e partisë, ndërsa ne e lusnim që të gjejë një zgjidhje kompromisi, ai e kishte filluar vazifen dhe kishte punuar fshehurazi. Ai kishte deponuar në Gjykatën e Shkupit emra të falsifikuar për kryetarë të degëve, me çka ka dashur të krijojë shumicë fiktive brenda në Këshillin qendror”,- tha Orhan Murtezani nga Lëvizja BESA.
I menjëhershëm ka qenë reagimi i krahut të Bilall Kasamit. Në një kumtesë me shkrim thuhet se Lëvizja BESA po merret me organizimin e kongresit dhe jo me shpifjet dhe mashtrimet e Orhan Murtezanit.
“Të gjitha strukturat e Lëvizjes BESA janë të fokusuara në organizimin e Kongresit të parë të partisë dhe nuk do humbim energji me çdo shpifje që po mundohen të bëjnë poltronët e paguar që punojnë për gjithçka por jo edhe për interesat e shqiptarëve të Maqedonisë”,- thuhet në reagimin me shkrim të Lëvizjes BESA që udhëhiqet nga Bilall Kasami.
Nga krahu i Gashit paralajmëruan shpalosjen e të tjera dokumenteve, siç deklaruan, të falsifikuara, ndërsa për rastin thanë do të paraqesin kallëzim penal.
Ata ndërkohë i quajtën spekulime zërat për bashkëpunimin me PDSh-në, por thonë se do të angazhohen për ndërtimin e urave të komunikimit me të gjitha partitë politike dhe veçmas me partitë opozitare të bllokut shqiptar. (Naim Ramadani, TVM2)