Ish-kryeministri Sali Berisha ka publikuar një video, ku shihet takimi mes biznesmenit Orest Sota dhe ish-ministrit të Brendshëm, Saimir Tahiri gjatë rikonstruksionit të Komisariatit numër 6 në Tiranë.
Sota është personi i arrestuar nga Policia e Elbasanit, të cilit gjatë një kontrolli iu gjetën në makinë 863 mijë euro dhe 2 leje drejtimi për mjete lundruese në emër të Saimir Tahirit.
Mësohet se firma që kishte marrë në atë kohë rikonstruksionin e Komisariatit numër 6 në Tiranë, ishte regjistruar vetëm pak javë para se të shpallej tenderi.
Siç duket nga pamjet, i pranishëm në këtë ceremoni ka qenë edhe vetë Drejtori i Përgjithshëm i Policisë, Haki Çako, i cili shoqëronte ministrin e Brendshëm të asaj kohe, Saimir Tahirin.
