Ish-presidentja e Kosovës, Vjosa Osmani, ka prezantuar zyrtarisht diplomatin dhe ish-deputetin shqiptar Kreshnik Çollaku si pjesë të rrugëtimit të saj politik, duke e cilësuar atë si figurë me përvojë, integritet dhe vizion euro-atlantik.
Osmani theksoi se Çollaku ka ndërtuar jetën e tij mes universitetit, diplomacisë dhe kauzës së Kosovës, duke kontribuar për më shumë se dy dekada në formimin e brezave të rinj me frymë demokratike dhe orientim perëndimor.
Ajo rikujtoi edhe angazhimin e tij në Ambasadën e Shqipërisë në Washington gjatë periudhave kyçe të konsolidimit ndërkombëtar të Kosovës, ku sipas saj ai ndihmoi në forcimin e mbështetjes amerikane për shtetin e Kosovës.
Në mesazhin e saj, Osmani vlerësoi rolin e Çollakut si ish-deputet i Partia Demokratike e Shqipërisë dhe si zë aktiv në diplomacinë parlamentare për mbrojtjen e pavarësisë, sovranitetit dhe integrimit euro-atlantik të Kosovës.
Ajo nënvizoi se Çollaku është gjithashtu një nga themeluesit e Lëvizjes Studentore të Dhjetorit 1990 në Shqipëri, brezi që rrëzoi diktaturën komuniste dhe orientoi shqiptarët drejt demokracisë dhe Perëndimit.
“Sot, ai është edhe shtetas krenar i Republikës së Kosovës dhe si këshilltar për politikë të jashtme në Presidencë ka dhënë kontribut të vyer në thellimin e raporteve me SHBA-të”, u shpreh Osmani.
Në fund, ajo i uroi mirëseardhje Çollakut në këtë “rrugëtim vendimtar” për Kosovën.(INA)
