Kryetari i Nismës Socialdemokrate, Fatmir Limaj, ka thënë që në bazë të informacioneve që ka, kryetari i LVV-së, Albin Kurti është takuar me presidentin e vendit, Hashim Thaçi.
“Unë kam informata që ka pasur takim, kjo nuk është informatë e çarshisë. Unë i shoh që do të funksionojnë sipas ligjit, secili i ka kompetencat që ia jep ligji, por shenjat nuk janë të këqija”, ka thënë Limaj në emisionin “Debat Plus” në RTV Dukagjini.
Kryetari i LVV-së Albin Kurti dhe presidenti i vendit Hashim Thaçi kanë shprehur haptazi kundërshtimet dhe qasjet e ndryshme politike.
Kandidatit për kryeministër nga Lëvizja Vetëvendosje, Albin Kurti pas certifikimit të rezultateve të zgjedhjeve të 6 tetorit, do t’i duhet t’i shkojë në zyrë presidentit të Kosovës Hashim Thaçi për të marrë mandatin si kryeministër.
Ky do të ishte edhe takimi i parë zyrtar sy më sy mes Kurtit dhe Thaçit.
Kurti në #DebatPernime përballë Jeta Xharrës, gjatë fushatës zgjedhore ka thënë se do të shkojë në Presidencë për procedurat kushtetuese, në rast se i merr votat për ta udhëhequr Qeverinë e re të Kosovës.“Ai është obligim kushtetues i tij dhe më në fund do të ketë diçka të mirë që do të bëj ai si President”, kishte thënë Kurti.
