Kryetarja e Komitetit të Helsinkit për të Drejtat e Njeriut në Serbi, Sonja Biserko, ka folur për incidentet e fundit në veri të Kosovës. Biserko, ka thënë se veriu i Kosovës kontrollohet nga krimi i organizuar serb. Sipas saj, qëllimi i këtyre incidenteve ishte që të bëhet përgjegjëse Prishtina.
“Incidentet në veri janë provokim dhe dëshirë për ta bërë Prishtinën përgjegjëse. Veriu kontrollohet nga serbët, ose më saktë nga krimi i organizuar”, ka thënë Biserko.
E pyetur nëse barrikadat në veri janë paguar dhe urdhëruar nga presidenti serb Aleksandar Vuçiq, humanistja serbe ka thënë se “gjithçka tregon se barrikadat janë organizuar nga Beogradi”. Ajo ka shtuar se serbët në Kosovë kontrollohen dhe përdorën për interesat e Beogradit dhe jo interesat e tyre.
“Gjithçka tregon se barrikadat janë organizuar nga Beogradi. Fatkeqësisht, serbët në Kosovë janë nën kontrollin e rreptë të Beogradit dhe ata nuk janë në gjendje të përcaktojnë interesat e tyre. Ata janë të instrumentalizuar për interesat e Beogradit që nuk përkojnë me interesat e tyre”, është shprehur Sonja Biserko.
