Haraçinës iu lëshua rryma, por EVN ka marrë premtim se në të ardhmen do të paguhen rregullisht faturat dhe nuk do të vidhen apo manipulohen orëmatësit.
Kjo u arrit pas një takimj dy orësh në ndërtesën e Komunës së Haraçinës, ku përveç kryetarit Ridvan Ibraimi, ishin të pranishëm edhe ministri i Ekonomisë, Kreshnik Bekteshi dhe menaxheri i Elektroshpërndarjes, Sasho Saltirovski.
Sipas Bekteshit, vjedhjet e energjisë elektrike, përkatësisht humbjet në sistem ka pothuajse në të gjitha komunat në mbarë vendin dhe nuk ka nevojë që Haraçina të jetë problemi dhe burimi kryesor i vjedhjeve.
Ai ka theksuar se humbjet apo vjedhjet e energjisë elektrike njihen si shpenzim me rastin e llogaritjes së çmimit të energjisë elektrike që paguajnë të gjithë qytetarët.
Si garanci se situata nuk do të përsëritet dhe se do të zvogëlohen humbjet, pra vjedhjet e energjisë elektrike, ai ka përmendur institucionet dhe shërbimet inspektuese, të cilat është dashur të bëjnë punën e tyre dhe të parandalojnë përshkallëzimin e situatës, pra vjedhjet.
Për EVN-në, është thelbësore që ekipet në terren të kenë qasje të sigurt dhe që pajisjet të mos shkatërrohen.
Sipas Saltirovskit, pas garancisë së djeshme të ministrit Bekteshi, ekipet e EVN-së kanë dalë në terren dhe kanë sanuar defektin në linjën e tensionit të mesëm që ka shkaktuar ndërprerjen treditore të furnizimit me energji elektrike në Haraçinë.
