Cody Gakpo do t’i bashkohet zyrtarisht Liverpoolit në fillim të afatit kalimtar të janarit, pasi kaloi me sukses testet mjekësore dhe ra dakord për kushtet personale me klubin nga Anfield të mërkurën.
Gakpo mbërrin në Anfield pas një paraqitje mbresëlënëse në Kupën e Botës për Holandën, gjatë së cilës ai shënoi tre herë në pesë ndeshje për vendin e tij.
Dhe ndërsa Klopp është i bindur se mund të ketë një ndikim të menjëhershëm në klubin e tij të ri, trajneri beson se në moshën vetëm 23-vjeçare ka shumë për të ardhur nga numri 18 i ri i Liverpoolit.
“Është vërtet një lajm i madh për ne që kemi qenë në gjendje ta marrim atë dhe më duhet të them se ka qenë një punë fantastike nga të gjithë të përfshirët, veçanërisht Julian Ward”, ka thënë fillimisht Klopp për Liverpoolfc.com.
“Puna që është bërë për këtë ka qenë me të vërtetë mbresëlënëse dhe në fund ne kemi arritur të nënshkruajmë me një lojtar të cilin e kemi njohur për shumë kohë dhe që besojmë se do të ketë një të ardhme vërtet të ndritur me ne”.
“Ka shumë gjëra për të pëlqyer për Cody. Ai është ende vetëm 23 vjeç por tashmë ka shumë përvojë”.
“Ai ishte kapiteni i PSV-së, ishte lojtari i vitit në Holandë sezonin e kaluar dhe, siç e kanë parë shumë njerëz, ai gjithashtu pati një Botëror të mrekullueshëm me ekipin e tij kombëtar”.
“Pra, është e qartë se ai tashmë është një lojtar me të vërtetë i mirë, por mosha e tij gjithashtu nënkupton se ai gjithashtu ka potencial për t’u bërë edhe më i mirë”.
“Në sulm, ai është shumë i gjithanshëm dhe mbi këtë ne e dimë se ai është një futbollist i zgjuar dhe gjithashtu një person i zgjuar, kështu që jemi vërtet të emocionuar që mund të punojmë me të”, përfundoi gjermani.
